ജിദ്ദ: യു.എസിനു പിന്നാലെ ടെല്‍ അവീവില്‍ നിന്ന് ജറൂസലമിലേക്ക് എംബസി മാറ്റിയ ഗ്വാട്ടിമലയുമായുള്ള എല്ലാ ഇടപാടുകളും റദ്ദാക്കാന്‍ അറബ് ലീഗ് തീരുമാനം.
ഗ്വാട്ടിമലയുമായുള്ള എല്ലാ ബന്ധവും വിഛേദിക്കുന്നതായി അറബ് ലീഗ് വക്താവ് മഹ്മൂദ് അഫീഫ് ആണ് കഴിഞ്ഞ ദിവസം പ്രസ്താവനയിലൂടെ അറിയിച്ചത്. കഴിഞ്ഞയാഴ്ച നടന്ന അറബ് ലീഗ് അംഗങ്ങളുടെ യോഗത്തില്‍ ഗ്വാട്ടിമലയുടെ തീരുമാനത്തെ അപലപിച്ചിരുന്നു.
തുടര്‍ന്നാണ് രാജ്യത്തിനെതിരേ രാഷ്ട്രീയ,സാമ്പത്തിക നടപടികള്‍ സ്വീകരിക്കാന്‍ തീരുമാനിച്ചത്. തീരുമാനം ഗ്വാട്ടിമലയെ അറിയിച്ചിട്ടുണ്ടെന്നും അദ്ദേഹം പറഞ്ഞു.
എംബസി ജറൂസലമിലേക്ക് മാറ്റുന്നത് അന്താരാഷ്ട്ര നിയമങ്ങളുടെ ലംഘനമാണെന്നും ഇത് യു.എന്‍ പ്രമേയത്തിന് എതിരാണെന്നും അദ്ദേഹം പറഞ്ഞു.