ജിദ്ദ: പൊതുമാപ്പ് കാലയളവില്‍ നിയമ ലംഘകരുടെ പദവി ശരിയാക്കില്ലെന്ന് ജവാസാത്ത് മേധാവി മേജര്‍ ജനറല്‍ സുലൈമാന്‍ അല്‍ യഹ്‌യ അറിയിച്ചു. നിയമ ലംഘകര്‍ക്ക് തടവോ പിഴയോ കൂടാതെ സ്വദേശങ്ങളിലേക്ക് പോകാനുള്ള അവസരമാണു പൊതുമാപ്പിലൂടെ ലഭ്യമാക്കുന്നത്. പൊതുമാപ്പ് കാലാവധിയില്‍ രാജ്യം വിടുന്നവര്‍ക്ക് പുതിയ വിസയില്‍ വീണ്ടും സഊദിയിലേക്ക് വരുന്നതിനു തടസ്സങ്ങളുണ്ടാകില്ല. സുരക്ഷാ കേസുകളിലോ സാമ്പത്തിക കേസുകളിലോ ഉള്‍പ്പെട്ടവരല്ലെന്ന് ഉറപ്പു വരുത്തിയായിരിക്കും എക്‌സിറ്റ് നല്‍കുക എന്നും ജവാസാത്ത് മേധാവി പറഞ്ഞു. അതേസമയം, 15000 റിയാല്‍ മുതല്‍ ഒരു ലക്ഷം റിയാല്‍ വരെയാണ് പിഴസംഖ്യയെന്നത് ജനങ്ങള്‍ക്ക് ബോധമുണ്ടാവണമെന്നും അദ്ദേഹം പറഞ്ഞു. നിയമ വിരുദ്ധര്‍ക്ക് തൊഴിലും സംരക്ഷണവും നല്‍കാതിരിക്കലും അവരെ കുറിച്ചുള്ള വിവരങ്ങള്‍ ബന്ധപ്പെട്ടവരെ അറിയിക്കലും ഓരോ സഊദി പൗരന്റെയും ബാധ്യയാണെന്നും അദ്ദേഹം പറഞ്ഞു. ഇത് കൃത്യമായി നിര്‍വഹിക്കുന്ന പക്ഷം 'നിയമ ലംഘകരില്ലാത്ത രാഷ്ട്രം' പദ്ധതി വിജയിപ്പിച്ചെടുക്കുവാന്‍ സാധിക്കുമെന്നും അദ്ദേഹം പ്രത്യാശ പ്രകടിപ്പിച്ചു.

ഹജ്ജ്, ഉംറ വിസകളില്‍ വന്ന് തിരിച്ചുപോവാത്തവര്‍ തുടങ്ങി ഏതു തരം ലംഘനമായാലും രാജ്യത്തേക്ക് കടന്നുവന്ന എല്ലാ വിദേശികള്‍ക്കും രാജ്യം വിടാനുള്ള അവസരമാണിത്. പൊതുമാപ്പിന്റെ  ചുമതല പാസ്‌പോര്‍ട്ട് വിഭാഗത്തിനായിരിക്കുമെന്നും അദ്ദേഹം കൂട്ടിച്ചേര്‍ത്തു.പൊതുമാപ്പ് കാലയളവില്‍ രാജ്യം വിടുന്നവരുടെ സേവനങ്ങള്‍ക്കായി പ്രത്യേക ഓഫിസ് സംവിധാനമുണ്ടായിരിക്കും. ഹജ്ജ്, ഉംറ സന്ദര്‍ശന വിസകളിലെത്തി കാലാവധി കഴിഞ്ഞും മടങ്ങിപ്പോകാത്തവര്‍ നേരെ വിമാനത്താവളംവഴി പോകാവുന്നതാണ്.

അവരുടെ യാത്രക്ക് യാതൊരു തടസവുമുണ്ടാവില്ല. യാത്രാ രേഖകളോ മറ്റോ ഇല്ലാത്തവര്‍ അവരവരുടെ എംബസിയുമായി കോര്‍ഡിനേറ്റു ചെയ്യുന്നതിനായി ഡീപ്പാര്‍ട്ടേഷന്‍ ഓഫീസുകളിലെത്തണം. ഡിപാര്‍ട്ടേഷന്‍ കേന്ദ്രങ്ങളില്‍ ആരെയും പിടിച്ചു നിര്‍ത്തില്ല. അദ്ദേഹം പറഞ്ഞു. അതോടൊപ്പം രാജ്യത്തിന്റെ എല്ലാ ഭാഗങ്ങളിലും ശക്തമായ പരിശോധനയും തുടരുന്നതാണെന്നും നിയമ ലംഘകര്‍ ഈ അവസരം ഉപയോഗപ്പെടുത്തണമെന്നും അദ്ദേഹം ആവര്‍ത്തിച്ചു.