ന്യൂഡല്‍ഹി: കെ.പി.സി.സി അധ്യക്ഷനായി മുതിര്‍ന്ന കോണ്‍ഗ്രസ് നേതാവ് എം.എം ഹസന് താല്‍ക്കാലിക ചുമതല. ഹൈക്കാമാന്‍ഡാണ് ഇക്കാര്യം ഔദ്യോഗികമായി അറിയിച്ചത്. ഹൈക്കമാന്‍ഡിന്റെ തീരുമാനം സംസ്ഥാന നേതൃത്വത്തെ അറിയിച്ചു.

ചുമതല ഉത്തരവാദിത്തത്തോടെ നിറവേറ്റുമെന്നും എ.ഐ.സി.സി.ക്കും സോണിയാ ഗാന്ധിക്കും നന്ദി അറിയിക്കുന്നുവെന്നും എം.എം ഹസന്‍ പ്രതികരിച്ചു. നാളെ തന്നെ പുതിയ ചുമതല ഏറ്റെടുക്കാനാണ് ഹൈക്കമാന്‍ഡ് നിര്‍ദേശിച്ചിരിക്കുന്നതെന്നും അദ്ദേഹം മാധ്യമ പ്രവര്‍ത്തകരോട് പറഞ്ഞു.

രണ്ടാഴ്ച മുമ്പാണ് സുധീരന്‍ കെ.പി.സി.സി അധ്യക്ഷ സ്ഥാനത്തു നിന്നും രാജി വച്ചത്. നിലവില്‍ വൈസ്പ്രസിഡന്റുമാരില്‍ സീനിയറായ നേതാവാണ് ഹസന്‍. സ്ഥിരം അധ്യക്ഷനെ നിയമിക്കും വരെയാണ് ഹസന് ചുമതല നല്‍കിയത്.