കാസര്‍കോട്: പകര്‍ച്ചവ്യാധികള്‍ നിയന്ത്രണ വിധേയമാക്കുന്നതിന്റെ ഭാഗമായി ജില്ലാ മെഡിക്കല്‍ ഓഫിസര്‍ ഡോ. എ.പി ദിനേശ് കുമാറിന്റെ അധ്യക്ഷതയില്‍ ബ്ലോക്ക് മെഡിക്കല്‍ ഓഫിസര്‍മാരുടെയും സൂപ്രണ്ടുമാരെയും പ്രോഗ്രാം ഓഫിസര്‍മാരെയും ഉള്‍പ്പെടുത്തി അടിയന്തിര യോഗം ചേര്‍ന്നു.
നിപ വൈറസ് സംബന്ധിച്ച് ആരോഗ്യ വകുപ്പ് ഡയറക്ടര്‍ നല്‍കിയിരിക്കുന്ന നിര്‍ദേശങ്ങള്‍ കൃത്യമായി പാലിക്കേണ്ടതും ആരോഗ്യ പ്രവര്‍ത്തകര്‍ പൊതുജനങ്ങള്‍ക്ക് ആവശ്യമായ നിര്‍ദേശങ്ങള്‍ നല്‍കേണ്ടതുമാണെന്നും ഡി.എം.ഒ അറിയിച്ചു.
പ്രതികൂല സാഹചര്യങ്ങളെ നേരിടുന്നതിനായി മെഡിക്കല്‍ ഓഫിസര്‍മാര്‍, സ്റ്റാഫ് നഴ്‌സ്, ലാബ് ടെക്‌നിഷ്യന്‍, ഫാര്‍മസിസ്റ്റ്, മറ്റ് ആരോഗ്യ പ്രവര്‍ത്തകര്‍ ഉള്‍പ്പെടുന്ന ദ്രുതകര്‍മസേന രൂപീകരിച്ചിട്ടുണ്ട്. പനി പടരുന്ന സാഹചര്യത്തില്‍ സി.എച്ച്.സികളിലും ജില്ലാ, താലൂക്ക് ആശുപത്രികളിലും പനി ക്ലിനിക്കുകള്‍ സജ്ജമാക്കിയിട്ടുണ്ട്.
ജില്ലാ ആശുപത്രിയിലും താലൂക്ക് ആശുപത്രികളിലും പ്രത്യേകം ഐസൊലേഷന്‍ വാര്‍ഡുകള്‍ സജ്ജമാക്കിയതായും ജില്ലാ മെഡിക്കല്‍ ഓഫിസര്‍ അറിയിച്ചു.