പേരാമ്പ്ര: കാര്‍ഷിക മേഖല, കുടിവെള്ള പദ്ധതി, പാര്‍പ്പിട പദ്ധതി എന്നിവയ്ക്ക് പ്രാധാന്യം നല്‍കിയ കൂത്താളി പഞ്ചായത്ത് വാര്‍ഷിക ബജറ്റ് ഭരണസമിതി അംഗീകരിച്ചു. പഞ്ചായത്ത് വൈസ് പ്രസിഡന്റ് കെ.എം പുഷ്പ അവതരിപ്പിച്ച ബജറ്റില്‍ 11,85,98,885 രൂപ വരവും 11,46,10,000 രൂപ ചെലവും 39,88,885 രൂപ മിച്ചവും കണക്കാക്കുന്നു. കുടിവെള്ള ക്ഷാമത്തിന് മുന്‍കരുതലായി കിണര്‍ റീചാര്‍ജിങ്, കുളങ്ങള്‍ തോടുകള്‍ മറ്റു ജലസ്രോതസുകളുടെ നവീകരണം ഉള്‍പ്പെടെ മഹാത്മാ ഗാന്ധി ദേശീയ തൊഴിലുറപ്പു പദ്ധതിക്ക് നാലു കോടി രൂപ, കാര്‍ഷിക മേഖലയ്ക്ക് 19 ലക്ഷം, പട്ടികജാതി വികസനത്തിന് 37 ലക്ഷം രൂപയും നീക്കിവച്ചു.
നവകേരള മിഷന്‍ പദ്ധതികളായ ലൈഫിന് ഒരു കോടി, ആര്‍ദ്രത്തിന് രണ്ടു ലക്ഷം, വിദ്യാഭ്യാസ സംരക്ഷണ യജ്ഞത്തിന് ആറു ലക്ഷം, ഹരിത കേരളം പദ്ധതിക്ക് രണ്ടു ലക്ഷം എന്നിങ്ങനെ തുക വകയിരുത്തി. പഞ്ചായത്ത് പ്രസിഡന്റ് കെ.പി അസ്സന്‍കുട്ടി അധ്യക്ഷനായി. ഷിജു പുല്യോട്ട്, ഇ.ടി സത്യന്‍, പി.ആര്‍ സാവിത്രി, ഇ.വി മധു, ഇ.കെ സുമ, പി. രാധ, ബിജി കണ്ണിപ്പൊയില്‍, വി.എം അനൂപ് കുമാര്‍, പി.എം ബിന്ദു ചര്‍ച്ചയില്‍ പങ്കെടുത്തു. പഞ്ചായത്ത് സെക്രട്ടറി ജേക്കബ് ജോര്‍ജ് നന്ദി പറഞ്ഞു.