കല്‍പ്പറ്റ: ജില്ലാ സാക്ഷരതാമിഷന്റെ ആഭിമുഖ്യത്തില്‍ കല്‍പ്പറ്റ മുനിസിപ്പല്‍ ടൗണ്‍ ഹാളില്‍ രണ്ടു ദിവസങ്ങളിലായി നടത്തിയ കലാസംഗമത്തില്‍ കല്‍പ്പറ്റ മുനിസിപ്പാലിറ്റി ബ്ലോക്ക് ജേതാക്കളായി. ജില്ലയിലെ മുനിസിപ്പാലിറ്റികള്‍ ബ്ലോക്കിന്റെ കൂടെ ചേര്‍ന്നാണ് മത്സരത്തില്‍ പങ്കെടുത്തത്.
സുല്‍ത്താന്‍ ബത്തേരി രണ്ടാം സ്ഥാനവും മാനന്തവാടി മൂന്നാംസ്ഥാനവും കരസ്ഥമാക്കി. നേരത്തെ മുട്ടില്‍ ഡബ്ല്യു.എം.ഒ ആര്‍ട്‌സ് ആന്‍ഡ് സയന്‍സ് കോളജില്‍ വെച്ച് നടത്തിയ കായികോത്സവത്തില്‍ സുല്‍ത്താന്‍ ബത്തേരി മുനിസിപ്പാലിറ്റി ബ്ലോക്ക് ഒന്നാംസ്ഥാനം കരസ്ഥമാക്കിയിരുന്നു. പ്രേരക് വി.ടി റോസമ്മ എവറോളിങ് ട്രേഫി ജില്ലാ പഞ്ചായത്ത് വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ എ ദേവകിയില്‍ നിന്നും കല്‍പ്പറ്റ മുനിസിപ്പാലിറ്റി ബ്ലോക്ക് ടീം ഏറ്റുവാങ്ങി. ഗുണഭോക്താക്കളുടെ വിഭാഗത്തില്‍ ഇ സുരേന്ദ്രന്‍ (കല്‍പ്പറ്റ ബ്ലോക്ക്) പത്താം തരംതുല്യതാ വിഭാഗത്തില്‍ വിശാലാക്ഷി (സുല്‍ത്താന്‍ ബത്തേരി), ഹയര്‍ സെക്കന്‍ഡറി വിഭാഗത്തില്‍ ഉണ്ണികൃഷ്ണന്‍ (കല്‍പ്പറ്റ), പ്രേരക്മാരുടെ വിഭാഗത്തില്‍ സി.കെ സരോജിനി (കല്‍പ്പറ്റ) എന്നിവര്‍ വ്യക്തിഗത ചാമ്പ്യന്‍മാരായി.
 ജില്ലാകോര്‍ഡിനേറ്റര്‍ പി.പി സിറാജ് സ്വാഗതവും അസി. കോര്‍ഡിനേറ്റര്‍ പി.എന്‍ ബാബു നന്ദിയും പറഞ്ഞു.