മട്ടാഞ്ചേരി: പാണ്ടിക്കുടിയില്‍ പുതിയതായി ആരംഭിച്ച കണ്‍സ്യൂമര്‍ ഫെഡിന്റെ വിദേശ മദ്യവില്‍പനശാലക്ക് നഗരസഭ ലൈസന്‍സ് നിഷേധിച്ചു.
മദ്യവില്‍പന ശാല പ്രവര്‍ത്തിക്കുന്നത് വീട്ടിലാണെന്ന് ചൂണ്ടിക്കാട്ടിയാണ് നഗരസഭ ആരോഗ്യ വിഭാഗം അനുമതി നിഷേധിച്ചത്. അതേസമയം നഗരസഭയുടെ അനുമതി ആവശ്യമില്ലന്ന നിലപാടില്‍ കണ്‍സ്യൂമര്‍ ഫെഡ് അധികൃതര്‍ മദ്യവില്‍പന ഇവിടെ തുടരുകയാണ് . ജനകീയ പ്രതിഷേധം അഞ്ചാം ദിവസം പിന്നിട്ടപ്പോള്‍ സമരത്തിന് കൂടുതല്‍ ജന പിന്തുണയേറി വരികയാണ്. പൊലിസ് കാവലില്‍ മദ്യവില്‍പന തുടരുന്നത് കടുത്ത പ്രതിഷേധത്തിനിടയാക്കിയിട്ടുണ്ട്.
മദ്യശാലയുടെ ഗെയിറ്റിന് സമീപം പോലും നില്‍ക്കാന്‍ സമരക്കാരെ അനുവദിക്കാതെ പൊലിസ് വിരട്ടുകയാണ്. സ്ത്രീകള്‍ ഉള്‍പ്പെടെയുള്ള സമരക്കാരെ മട്ടാഞ്ചേരി എസ്.ഐ ദിനേശ് കുമാറിന്റെ നേതൃത്വത്തില്‍ ഭീഷണിപ്പെടുത്തുകയാണെന്നും ആക്ഷേപമുണ്ട്.
കഴിഞ്ഞ ദിവസം സമര പന്തല്‍ സന്ദര്‍ശിച്ച കെ.ജെ മാക്‌സി എം.എല്‍.എ സമരത്തിന് പൂര്‍ണ പിന്തുണ നല്‍കുമെന്ന് അറിയിച്ചെങ്കിലും മദ്യശാല മാറ്റുന്നതിനായുള്ള യാതൊരു നടപടികളും ഇത് വരെയുണ്ടായിട്ടില്ല. ഇത് കടുത്ത പ്രതിഷേധത്തിനിടയാക്കിയിട്ടുണ്ട്.
മദ്യശാല മാറ്റുന്നത് വരെ ജനകീയ പ്രതിഷേധം ശക്തമായി തുടരുവാനാണ് തീരുമാനം. റസിഡന്‍സ് അസോസിയേഷനുകള്‍ ഉള്‍പ്പെടെ ഇരുപതോളം സംഘടനകള്‍ ഇപ്പോള്‍ സമരത്തിന് പിന്തുണയുമായി എത്തിയിട്ടുണ്ട്. ജനവാസ മേഖലയില്‍ നിലവില്‍ ഒരു മദ്യശാലയും ബിയര്‍ പാര്‍ലറും ഉള്ളപ്പോള്‍ മറ്റൊന്ന് കൂടി പ്രവര്‍ത്തിക്കുവാന്‍ അനുവദിക്കില്ലന്ന കടുത്ത നിലപാടിലാണ് നാട്ടുകാര്‍.