ചങ്ങരംകുളം: കഴിഞ്ഞ ദിവസം രാത്രിയോടെ ആഞ്ഞുവീശിയ കാറ്റിലും മഴയിലും വ്യാപക നാശം. പലയിടത്തും വൈദ്യുതി ബന്ധം തകരാറിലായി. ചങ്ങരംകുളത്തിനടുത്ത് ആലങ്കോട്ട് ഇടിമിന്നലില്‍ യുവതിക്കു പരുക്കേറ്റു. കീഴേപുറം ക്ഷേത്രത്തിനു സമീപം താമസിക്കുന്ന ചീരന്‍കുഴിയില്‍ സുചിത്ര (25) യ്ക്കാണ് പരുക്കേറ്റത്. ഇവര്‍ക്കു ചങ്ങരംകുളത്തെ സ്വകാര്യ ആശുപത്രിയില്‍ ചികിത്സ നല്‍കി.
കനത്ത മഴയിലും ആഞ്ഞുവീശിയ കാറ്റിലും ഒട്ടേറെ വീടുകള്‍ തകരുകയും മരങ്ങള്‍ നിലംപൊത്തുകയും ചെയ്തിട്ടുണ്ട്. റോഡുകളില്‍ മരങ്ങളും മറ്റും വീണതു കാരണം ചിലയിടങ്ങളില്‍ ഗതാഗതം താറുമാറാകുകയും ചെയ്തു. ആലങ്കോട്, നന്നംമുക്ക് പഞ്ചായത്തുകളുടെ പരിധിയില്‍ ഇരുപത്തിയഞ്ചോളം കിണറുകള്‍ ഇടിഞ്ഞിട്ടുണ്ട്. ആലംകോട് അട്ടേക്കുന്ന് തച്ചുപറമ്പ്, ചിയ്യാനൂര്‍ ഭാഗങ്ങളിലാണ് കനത്ത കാറ്റിനും മഴയ്ക്കുമൊപ്പം ആലിപ്പഴ വീഴ്ചയുമുണ്ടായി. പൊന്നാനി മേഖലയിലും മഴയില്‍ കനത്ത നാശനഷ്ടമുണ്ടായിട്ടുണ്ട്.