ലണ്ടന്‍: പാകിസ്താനെതിരായ ഒന്നാം ക്രിക്കറ്റ് ടെസ്റ്റില്‍ ഇംഗ്ലണ്ട് പൊരുതുന്നു. ഒന്നാം ഇന്നിങ്‌സില്‍ 184 റണ്‍സിന് പുറത്തായ ഇംഗ്ലണ്ട് ലീഡ് വഴങ്ങി. പാകിസ്താന്‍ ഒന്നാം ഇന്നിങ്‌സില്‍ 363 റണ്‍സെടുത്തിരുന്നു. രണ്ടാം ഇന്നിങ്‌സ് തുടങ്ങിയ ഇംഗ്ലണ്ട് മൂന്നാം ദിനം ഒടുവില്‍ വിവരം കിട്ടുമ്പോള്‍ ആറ് വിക്കറ്റ് നഷ്ടത്തില്‍ 231 റണ്‍സെന്ന നിലയില്‍. നാല് വിക്കറ്റ് ശേഷിക്കെ ഇംഗ്ലണ്ടിന് 52 റണ്‍സ് ലീഡ്.
68 റണ്‍സെടുത്ത ക്യാപ്റ്റന്‍ ജോ റൂട്ട് മുന്‍നിരയില്‍ തിളങ്ങിയപ്പോള്‍ മറ്റൊരാളും പിന്തുണയ്ക്കാനില്ലാതെ പോയി. ഒരു ഘട്ടത്തില്‍ 110 റണ്‍സെടുക്കുന്നതിനിടെ ആറ് വിക്കറ്റ് നഷ്ടമായ ഇംഗ്ലണ്ടിനെ ഏഴാം വിക്കറ്റില്‍ ഒത്തുചേര്‍ന്ന ജോസ് ബട്‌ലര്‍- ഡൊമിനിക്ക് ബെസ് സഖ്യമാണ് കരകയറ്റിയത്. പിരിയാത്ത ഏഴാം വിക്കറ്റില്‍ ഇരുവരും അര്‍ധ സെഞ്ച്വറികളുമായി പൊരുതുന്നു. ബട്‌ലര്‍ 66ഉം ബെസ് 51ഉം റണ്‍സെടുത്തിട്ടുണ്ട്. പാകിസ്താനായി മുഹമ്മദ് ആമിര്‍, മുഹമ്മദ് അബ്ബാസ്, ഷഹബാദ് ഖാന്‍ എന്നിവര്‍ രണ്ട് വീതം വിക്കറ്റുകള്‍ പങ്കിട്ടു.
നേരത്തെ 68 റണ്‍സെടുത്ത ബാബര്‍ അസം, 59 റണ്‍സെടുത്ത ആസാദ് ഷഫീഖ്, 52 റണ്‍സെടുത്ത ഷഹബാദ് ഖാന്‍, 50 റണ്‍സെടുത്ത അസ്ഹര്‍ അലി എന്നിവരുടെ അര്‍ധ സെഞ്ച്വറികളുടെ കരുത്തിലാണ് പാകിസ്താന്‍ മികച്ച സ്‌കോറിലെത്തിയത്.