മണ്ണഞ്ചേരി: കലവൂരില്‍ പ്രവര്‍ത്തിക്കുന്ന ബിവറേജസ് ഔട്ട് ലെറ്റ് മാറ്റി സ്ഥാപിക്കുന്നതില്‍ പ്രതിഷേധം ശക്തം. പാതിരപ്പള്ളി ഉദയാ സ്റ്റുഡിയോക്ക് പടിഞ്ഞാറ് പഴയകാട്ടിലാണ് ഷോപ്പിനായി അധികൃതര്‍ ഇപ്പോള്‍ സ്ഥലം കണ്ടെത്തിയിട്ടുള്ളത്. നിലവില്‍ കയര്‍ ഫാക്ടറിയായി പ്രവര്‍ത്തിച്ചുവരുന്ന ഇവിടെ പ്രതിഷേധക്കാര്‍ ഇതിന്റെ പ്രവര്‍ത്തനവും നിര്‍ത്തിവച്ചിരിക്കുകയാണ്. നാട്ടുകാര്‍ ഈ സ്ഥാപനത്തിനുമുന്നില്‍ അഞ്ചുദിവസമായി രാപ്പകല്‍ സമരം നടത്തിവരുകയാണ്.
 സ്ത്രീകളടക്കം നൂറുകണക്കിനാളുകളാണ് സമരപന്തലില്‍ നിത്യേനയായി എത്തുന്നത്. സമീപത്തെ ആരാധനാലയങ്ങളിലേക്കും ആശുപത്രിയടക്കമുള്ള സ്ഥലങ്ങളിലേക്ക് പോകുന്നതിനുള്ള ഏക പാതയ്ക്കരുകിലാണ് വിദേശമദ്യശാലയ്ക്കായി അധികൃതര്‍ സ്ഥലം തിരഞ്ഞെടുത്തതെന്ന ആക്ഷേപമാണ് സമരസമിതി ആരോപിക്കുന്നത്.
വൈകുന്നേരം നാലിന് ബിവറേജസ് ഔട്ട് ലെറ്റിനായി സ്ഥലം നല്‍കിയ പാതിരപ്പള്ളിയിലെ പൊന്നുപിള്ളയുടെ വീട്ടിലേക്ക് ബഹുജനമാര്‍ച്ച് നടത്തി. നൂറുകണക്കിന് പേര്‍ പങ്കെടുത്ത മാര്‍ച്ച് പൊന്നുപിള്ളയുടെ വീടിന് നൂറുമീറ്റര്‍ അകലെ പൊലിസ് തടഞ്ഞു.
 തുടര്‍ന്ന് നടന്ന ധര്‍ണയില്‍ പഞ്ചായത്തംഗം രശ്മി രാജേഷ്, സമരസമിതി ജനറല്‍ കണ്‍വീനര്‍ ടി.പി.ഷാജി,വി.സേതുനാഥ്, പി. ശശികുമാര്‍, മുരലീധരന്‍, സുലേഖ പ്രശാന്തന്‍ പ്രസംഗിച്ചു. ബിവറേജസ് ഔട്ട് ലെറ്റിനായി തിരഞ്ഞടുത്ത സ്ഥലത്തേക്ക് ബി.ജെ.പി, മഹിളാമോര്‍ച്ചാ പ്രവര്‍ത്തകരും പ്രതിഷേധമാര്‍ച്ച് നടത്തി.