വടകര: കാലവര്‍ഷം കനത്തതോടെ വടകരയിലും വിവിധ മേഖലകളിലും വ്യാപക നാശനഷ്ടം തുടരുന്നു. രണ്ടു ദിവസമായി തുടര്‍ച്ചയായി പെയ്യുന്ന കനത്ത മഴയില്‍ ഇന്നലെ താഴെഅങ്ങാടിയില്‍ വീടിന്റെ മേല്‍ക്കൂര പൂര്‍ണമായും നിലംപൊത്തി.
നഗരസഭയിലെ 45-ാം വാര്‍ഡായ പാണ്ടികശാല വളപ്പിലെ ആനങ്ങാട്ട് പുതിയപുരയില്‍ നഫീസയുടെ മകന്‍ അഷ്‌റഫിന്റെ വീടാണു രാത്രി ഏഴോടെ തകര്‍ന്നുവീണത്. മഴയിലും ശക്തമായ കാറ്റിലുമാണ് ഓടിട്ട വീട് തകര്‍ന്നത്.
നോമ്പുതുറ സമയമായതിനാല്‍ എല്ലാവരും വീട്ടിനുള്ളില്‍ തന്നെ ഉണ്ടായിരുന്നു. എന്നാല്‍, മേല്‍ക്കൂര തകര്‍ന്നുവീഴുന്ന ശബ്ദം കേട്ട് എല്ലാവരും പുറത്തേക്ക് ഓടിയതിനാല്‍ അപകടം ഒഴിവാകുകയായിരുന്നു.