ലണ്ടന്‍: ഒന്നാം ടെസ്റ്റില്‍ പാകിസ്താനോട് അപ്രതീക്ഷിത തോല്‍വി വഴങ്ങിയതിന്റെ ക്ഷീണത്തില്‍ ഇംഗ്ലണ്ട് ഫോമില്ലാത്ത മാര്‍ക് സ്റ്റോണ്‍മാനെ ഒഴിവാക്കി. താരത്തിന് പകരം കീറ്റന്‍ ജെന്നിങ്‌സിനെ ഇംഗ്ലണ്ട് ടീമിലേക്ക് തിരികെ വിളിച്ചു. 2016ല്‍ മുംബൈയില്‍ ഇന്ത്യക്കെതിരായ ടെസ്റ്റ് പോരാട്ടത്തില്‍ അരങ്ങേറ്റത്തില്‍ തന്നെ സെഞ്ച്വറി നേടി വരവറിയിച്ച ജെന്നിങ്‌സിന് പിന്നീട് ആ മികവ് പുലര്‍ത്താന്‍ സാധിക്കാതെ പോയിരുന്നു.
പാകിസ്താനെതിരായ ഒന്നാം ടെസ്റ്റില്‍ ഇംഗ്ലീഷ് ബാറ്റിങ് നിരയുടെ തകര്‍ച്ചയാണ് തോല്‍വിക്ക് കാരണമായത്. ബാറ്റിങ് പ്രശ്‌നങ്ങള്‍ പരിഹരിക്കുക ലക്ഷ്യമിട്ടാണ് ജെന്നിങ്‌സിന് വീണ്ടും അവസരം നല്‍കാന്‍ തീരുമാനിച്ചത്. കഴിഞ്ഞ വര്‍ഷം ഓഗസ്റ്റിലാണ് ജെന്നിങ്‌സ് അവസാനമായി ഇംഗ്ലണ്ടിനായി കളിച്ചത്.