ഇംഫാല്‍: മണിപ്പൂരില്‍ സേനാപതി ജില്ലയില്‍ ബസ് നദിയിലേക്ക് മറിഞ്ഞ് ഒരു സ്ത്രീ അടക്കം പത്ത് പേര്‍ മരിച്ചു. 25പേര്‍ക്ക് പരുക്കേറ്റു. ഇംഫാല്‍-ദിമാപൂര്‍ ദേശീയ പാതയില്‍ മാഖം ഗ്രാമത്തിനടുത്ത് ഇന്നലെ പുലര്‍ച്ചെയാണ് അപകടമുണ്ടായത്. വിനോദയാത്രക്കാര്‍ സഞ്ചരിച്ച ബസാണ് അപകടത്തില്‍പ്പെട്ടത്. യാത്രയ്ക്കിട ബസ് നദിയിലേക്ക് മറിയുകയായിരുന്നുവെന്ന് പൊലിസ് അറിയിച്ചു. അപകടകാരണം വ്യക്തമല്ലെന്നും പൊലിസ് പറഞ്ഞു. പരുക്കേറ്റവരെ ആശുപത്രിയില്‍ പ്രവേശിപ്പിച്ചിരിക്കുകയാണ്. ഇവരില്‍ നിരവധിപേര്‍ ഗുരുതരാവസ്ഥയിലാണെന്നും മരണസംഖ്യ ഉയരാന്‍ സാധ്യതയുണ്ടെന്നും പൊലിസ് വ്യക്തമാക്കി.
സംഭവത്തില്‍ അന്വേഷണം ആരംഭിച്ചിട്ടുണ്ട്. അപകടത്തില്‍പ്പെട്ടവര്‍ക്ക് സര്‍ക്കാര്‍ എല്ലാവിധ സഹായങ്ങളും ചെയ്യുമെന്ന് മണിപ്പൂര്‍ മുഖ്യമന്ത്രി എന്‍. ബിരണ്‍ സിങ് അറിയിച്ചു.