തൊടുപുഴ: ഇടുക്കി ജില്ലയിലെ എട്ട് വില്ലേജുകളില്‍ സ്വന്തം ഭവനിര്‍മാണത്തിന് അനുമതിക്കായുള്ള തടസം നീക്കി സംസ്ഥാന സര്‍ക്കാരിന്റെ ഉത്തരവ്. മൂന്നാര്‍ മേഖലയിലെ ചിന്നക്കനാല്‍, കണ്ണന്‍ ദേവന്‍ ഹിത്സ്, ശാന്തന്‍പാറ, വെള്ളത്തൂവല്‍, ആനവിലാസം, പള്ളിവാസല്‍, ആനവിരട്ടി, ബൈസണ്‍വാലി വില്ലേജുകളില്‍ സ്വന്തം ഗൃഹനിര്‍മാണ പ്രവൃത്തികള്‍ക്ക് നിലവിലുള്ള നിയമങ്ങളുടെ അടിസ്ഥാനത്തില്‍ ഇനിമുതല്‍ അതാത് വില്ലേജ് ഓഫീസര്‍മാര്‍ക്ക് നോ ഒബ്ജക്ഷന്‍ സര്‍ടിഫിക്കറ്റ് അനുവദിക്കാമെന്ന ഉത്തരവാണ് പുറത്തിറങ്ങിയത്. ഇതോടെ ജില്ലയിലെ ഭൂമിയുമായി ബന്ധപ്പെട്ട മറ്റൊരു പ്രശ്‌നത്തിനു കൂടി പരിഹാരമായി.
ജനങ്ങളുടെ ബുദ്ധിമുട്ട് മനസിലാക്കിയ മന്ത്രി എം എം മണി നടത്തിയ ശ്രദ്ധേയമായ ഇടപെടലിലാണ് ഉത്തരവിറങ്ങിയത്. റവന്യൂ വകുപ്പിന്റെ നോ ഒബ്ജക്ഷന്‍ സര്‍ടിഫിക്കറ്റും പഞ്ചായത്തിന്റെ അനുമതിയുമില്ലാതെ മൂന്നാര്‍ മേഖലയില്‍ ഒരു നിര്‍മാണപ്രവര്‍ത്തനവും നടക്കുന്നില്ലെന്ന് റവന്യൂ, തദ്ദേശസ്വയംഭരണ, പൊലിസ്, വനം വകുപ്പു മേധാവികള്‍ ഉറപ്പുവരുത്തണമെന്ന് നേരത്തെ ഹൈക്കോടതി ഡിവിഷന്‍ ബഞ്ച് ഉത്തരവിട്ടിരുന്നു. ഇതോടെയാണ് പ്രശ്‌നങ്ങളുടെ തുടക്കം. കോടതിവിധി പാലിക്കുന്നതിന്, ബന്ധപ്പെട്ട വില്ലേജുകളിലെ നിര്‍മാണ പ്രവര്‍ത്തനങ്ങള്‍ക്ക് റവന്യൂ വകുപ്പ് എന്‍ഒസി നിര്‍ബന്ധമാക്കി. സര്‍ടിഫിക്കറ്റ് അനുവദിക്കുന്നതിന് മാനദണ്ഡങ്ങളും നിശ്ചയിച്ച് ഇടുക്കി ജില്ലാ കലക്ടര്‍ സര്‍ക്കുലറും പുറപ്പെടുവിച്ചു.
ദേവികുളം സബ് കലക്ടറെയാണ് എന്‍ഒസി അനുവദിക്കാന്‍ ചുമതലപ്പെടുത്തിയിരുന്നത്. എന്നാല്‍, സര്‍ടിഫിക്കറ്റ് ലഭിക്കാനുള്ള കാലതാമസവും ദൂരെ വില്ലേജുകളിലെ താമസക്കാര്‍ക്ക് ദേവികുളത്ത് എത്തി സര്‍ടിഫിക്കറ്റ് വാങ്ങുന്നതിലുള്ള പ്രയാസവും പരാതിക്ക് ഇടയാക്കി. ഈ സാഹചര്യത്തില്‍ പ്രദേശത്ത് ജനങ്ങള്‍ സമരവും നടത്തിയിരുന്നു. തുടര്‍ന്ന്, റവന്യൂ- വനം മന്ത്രിമാരുടെ സംയുക്താഭിമുഖ്യത്തില്‍ യോഗവും ചേര്‍ന്നു. ഹൈക്കോടതിവിധി ലംഘിക്കപ്പെടാതെ നിയമപരവും ഭരണപരവുമായ പരിഹാരമാണ് ഒടുവില്‍ കണ്ടെത്തിയത്. ഈ പഞ്ചായത്തുകളില്‍ വൈദ്യുതി കണക്ഷന്‍ ലഭിക്കുന്നതിനുള്ള തടസവും മന്ത്രി എം എം മണി മുന്‍കൈയെടുത്ത് കഴിഞ്ഞയാഴ്ച പരിഹരിച്ചിരുന്നു. സ്വന്തം ഭൂമിയില്‍ കര്‍ഷകര്‍ നട്ടുപിടിപ്പിച്ച മരങ്ങള്‍ വെട്ടുന്നതിനുള്ള അനുമതിയാണ് ഇനി കര്‍ഷകര്‍ക്കു വേണ്ടത്. ഇക്കാര്യത്തില്‍ തിരുമാനമായെങ്കിലും വനംവകുപ്പില്‍ നിന്നും ഇത് ഉത്തരവായി ഇറങ്ങേണ്ടതുണ്ട്.