ചാലക്കുടി: വാല്‍പ്പാറയില്‍ അമ്മയോടൊപ്പം തേയിലതോട്ടത്തില്‍ നിന്ന് ആറുവയസുകാരിയെ പുലി ആക്രമിച്ച് കൊന്നു. ജാര്‍ഖണ്ഡ് സ്വദേശികളായ അതുല്‍ അന്‍സാരിയുടേയും ഭാര്യ നാസിരെന്‍ ഖാട്ടൂനിന്റേയും മകള്‍ അപ്‌സര ഖാത്തൂനാണ് മരിച്ചത്. 

ഉഴേമല എസ്റ്റേറ്റില്‍ ജോലിയ്ക്ക് വന്നതായിരുന്നു കുടുംബം. മാതാപിതാക്കള്‍ക്കൊപ്പം കുഞ്ഞുമായി തേയിലത്തോട്ടത്തില്‍ നില്‍ക്കുമ്പോഴായിരുന്നു പുള്ളിപ്പുലിയുടെ ആക്രമണം. പുള്ളിപ്പുലി കുട്ടിയെ വലിച്ചിഴച്ച് കൊണ്ടുപോവുകയായിരുന്നു. മാതാപിതാക്കള്‍ കുട്ടിയെ രക്ഷിക്കാന്‍ ശ്രമിച്ചെങ്കിലും പുള്ളിപ്പുലിയെ കണ്ടെത്താനായില്ല. പൊലീസും വനംവകുപ്പും സ്ഥലത്തെത്തി കുട്ടിയെ വാല്‍പ്പാറ സര്‍ക്കാര്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. കുട്ടിയുടെ മൃതദേഹം ആശുപത്രിയില്‍ സൂക്ഷിച്ചിരിക്കുകയാണ്. പോസ്റ്റുമോര്‍ട്ടത്തിന് ശേഷം കുടുംബത്തിന് വിട്ടുനല്‍കും.