കല്‍പ്പറ്റ: പ്രിയങ്കാ ഗാന്ധിയുടെ സ്ഥാനാര്‍ത്ഥിത്വത്തോടെ ദേശീയ ശ്രദ്ധ ആകര്‍ഷിക്കുന്ന വയനാട്ടില്‍ മണ്ഡലം കണ്‍വെന്‍ഷനുകള്‍ക്ക് തുടക്കം കുറിച്ച് യു.ഡി.എഫ്. ഈ മാസം 23ന് പ്രിയങ്ക ഗാന്ധി വയനാട്ടില്‍ എത്തി നാമനിര്‍ദ്ദേശപത്രിക സമര്‍പ്പിക്കും. പ്രിയങ്കയ്‌ക്കൊപ്പം നിര്‍ദ്ദേശ പത്രിക സമര്‍പ്പിക്കാന്‍ രാഹുല്‍ഗാന്ധിയും വയനാട്ടില്‍ എത്തും.

രാഹുലിനൊപ്പം റോഡ് ഷോയില്‍ പങ്കെടുത്ത ശേഷമാകും വയനാട് കലക്ടറേറ്റില്‍ വരണാധികാരിയായ ജില്ലാ കളക്ടര്‍ക്ക് മുന്നില്‍ പത്രിക സമര്‍പ്പിക്കുകയെന്ന് വയനാട് പാര്‍ലമെന്റ് തിരഞ്ഞെടുപ്പ് സമിതി കണ്‍വീനര്‍ എ.പി അനില്‍കുമാര്‍ എം.എല്‍.എ പറഞ്ഞു. 

പ്രതിപക്ഷ നേതാവ് വി.ഡി സതീശനും, കെ.പി.സി.സി പ്രസിഡന്റ് കെ സുധാകരനുമാണ് വയനാട്ടില്‍ യു.ഡി.എഫ് മണ്ഡലം കണ്‍വെന്‍ഷനുകളുടെ ഭാഗമാകുന്നത്. 7 നിയോജകമണ്ഡലങ്ങളിലെയും കണ്‍വെന്‍ഷനുകള്‍ ഇന്ന് പൂര്‍ത്തിയാകും. 

മണ്ഡലത്തിലെ സ്ഥാനാര്‍ത്ഥി ചിത്രം തെളിഞ്ഞതോടെ നാളെ മുതല്‍ മുന്നണികള്‍ പ്രചാരണം ശക്തമാക്കാന്‍ ഒരുങ്ങുകയാണ്. എല്‍ഡിഎഫ് സ്ഥാനാര്‍ത്ഥി സത്യന്‍ മൊകേരി വയനാട്ടിലെ പ്രശ്‌നങ്ങള്‍ ഉയര്‍ത്തിക്കാട്ടിയാണ് തെരഞ്ഞെടുപ്പ് പ്രചരണങ്ങള്‍ക്കിറങ്ങുന്നത്. ഉപതെരഞ്ഞെടുപ്പിനുള്ള ബിജെപി സ്ഥാനാര്‍ത്ഥി പ്രഖ്യാപനം ഇന്ന് തന്നെ ഉണ്ടായേക്കും.