തിരുവനന്തപുരം: നളന്ദ വര്‍ക്കിങ് വിമന്‍സ് ഹോസ്റ്റലിലെ അനധികൃത താമസക്കാര്‍ മൂന്നുദിവസത്തിനകം ഒഴിഞ്ഞ് ബാധ്യതകള്‍ തീര്‍ക്കണമെന്ന് ജില്ലാ കലക്ടര്‍ ബിജു പ്രഭാകര്‍ അറിയിച്ചു.
ചീഫ് സെക്രട്ടറിയുടെ നിര്‍ദേശപ്രകാരം പൊതുമരാമത്ത് വകുപ്പ് കെട്ടിടവിഭാഗം ചീഫ് എന്‍ജിനീയര്‍ ഹോസ്റ്റലിലെ അന്തേവാസികളെക്കുറിച്ചുള്ള പരാതികള്‍ പരിശോധിക്കുകയും ഇത് സംബന്ധിച്ച് വിശദമായ റിപ്പോര്‍ട്ട് സര്‍ക്കാരിന് സമര്‍പ്പിക്കുകയും ചെയ്തിരുന്നു. റിട്ടയര്‍ ചെയ്തിട്ടും താമസിക്കുന്നവര്‍, വീട്‌വെച്ച് മാറിയിട്ടും അത് ഓഫിസില്‍ അറിയിക്കാതെ മറ്റ് ജീവനക്കാര്‍ക്ക് വാടകയ്ക്ക് നല്‍കിയവര്‍, അനധികൃതമായി ഒന്നിലധികം ഗസ്റ്റുകളെ താമസിപ്പിക്കുന്നവര്‍, ഡെപ്യൂട്ടേഷനില്‍ പോയവര്‍, സ്ഥലം മാറി പോയവര്‍ എന്നീ വിഭാഗത്തിലുള്ളവര്‍, റൂം ഒഴിയാതെ പൂട്ടിയിട്ടിരിക്കുന്നവരൊക്കെ നളന്ദയില്‍ ഉള്ളതായി കണ്ടെത്തി. ഒരാള്‍ക്ക് മാത്രം താമസിക്കാനുള്ള മുറിയില്‍ കുടുംബമായി താമസിക്കുന്നവരുമുണ്ട്. വൃത്തിഹീനമായ അന്തരീക്ഷത്തില്‍ പാചകം നടത്തി പരിസര മലിനീകരണവും പകര്‍ച്ചവ്യാധിക്കു കാരണമാകുന്നവിധവും താമസിക്കുന്നതായും അനധികൃതമായി വൈദ്യുതോപകരണങ്ങള്‍ (ഹീറ്ററുകള്‍, ഫ്രിഡ്ജ്, റ്റി.വി., ഇന്‍ഡക്ഷന്‍ കുക്കര്‍, തേപ്പ്‌പെട്ടി എന്നിവ) ഉപയോഗിക്കുന്നതായും കണ്ടെത്തി.
ദീര്‍ഘകാലമായി പൂട്ടിയിരിക്കുന്ന എല്ലാ മുറികളും റവന്യൂ, പോലീസ്, പൊതുമരാമത്ത് വിഭാഗം എന്നിവരുടെ സഹകരണത്തോടെ ഒഴിപ്പിക്കാന്‍ നല്‍കിയ ശുപാര്‍ശ സര്‍ക്കാര്‍ അംഗീകരിച്ചതിന്റെ അടിസ്ഥാനത്തില്‍ മൂന്ന് ദിവസത്തിനകം അനധികൃത താമസക്കാര്‍ ബാധ്യതകള്‍ തീര്‍ത്ത് താക്കോല്‍ തിരിച്ചേല്‍പ്പിക്കണമെന്ന് ജില്ലാ കലക്ടര്‍ അറിയിച്ചു.