പുല്‍പ്പള്ളി: വേനല്‍മഴ തുടര്‍ച്ചയായി പെയ്യുന്നത് നെല്‍കര്‍ഷകരെ പ്രതിസന്ധിയിലാക്കുന്നു.
കഴിഞ്ഞ ഒരാഴ്ചയായി തുടര്‍ച്ചയായി പെയ്യുന്ന മഴകാരണം നെല്ല് കൊയ്യാന്‍ കഴിയാതെയും കൊയ്തു വച്ച നെല്ലുകള്‍ സുരക്ഷിത സ്ഥാനത്ത് എത്തിക്കാന്‍ കഴിയാതെയും നെല്ല് മുളച്ചുപൊങ്ങി. ഇതോടെ നെല്ല് ഉപേക്ഷിക്കേണ്ട അവസ്ഥയിലാണ് കര്‍ഷകര്‍. കേരള, കര്‍ണാടക അതിര്‍ത്തിയിലെ മരക്കടവ്, കൊളവള്ളി, ഗൃഹന്നൂര്‍, പെരിക്കല്ലൂര്‍ തുടങ്ങിയ പാടങ്ങളിലാണ് വിളഞ്ഞു കിടക്കുന്ന നെല്ല് കൊയ്യാനാവാതെ കര്‍ഷകര്‍ പ്രതിസന്ധിയിലായിരിക്കുന്നത്. തുടര്‍ച്ചയായി മഴ പെയ്യുന്നത് മൂലം മെതിയന്ത്രവും പാടത്ത് ഇറക്കാനാകുന്നില്ല. ഭൂരിഭാഗം കര്‍ഷകരും സ്ഥലം പാട്ടത്തിനെടുത്താണ് നെല്‍കൃഷി ചെയ്യുന്നത്. ബാങ്കുകളില്‍ നിന്നും അയല്‍ക്കൂട്ടത്ത് നിന്നും വായ്പ എടുത്ത് നെല്‍കൃഷി ചെയ്ത കര്‍ഷകരാണ് ഭൂരിഭാഗവും.