അനിശ്ചിതകാല സമരം ഒരു മാസം പിന്നിട്ടു; നിരാഹാരം ഏഴാം നാളില്‍
പയ്യന്നൂര്‍: രാമന്തളിയിലെ നാവിക അക്കാദമി മാലിന്യ പ്ലാന്റ് അടച്ചു പൂട്ടണമെന്ന് ആവശ്യപ്പെട്ട് ജന ആരോഗ്യ സംരക്ഷണ സമിതി അക്കാദമി ഗെയിറ്റിനു മുന്നില്‍ നടത്തുന്ന അനിശ്ചിതകാല സമരം ഒരു മാസം പിന്നിട്ടു. സമരപന്തലില്‍ സമരസമിതി വൈസ് ചെയര്‍മാന്‍ പി.കെ നാരായണന്റെ നിരാഹാര സമരം ഏഴാം ദിവസത്തിലേക്ക് കടന്നു. നാരായണന്റെ ആരോഗ്യസ്ഥിതി വിലയിരുത്തുന്നതിനായി പയ്യന്നൂര്‍ താലൂക്ക് ആശുപത്രിയിലെ ഡോക്ടര്‍മാരുടെ സംഘം സമരപന്തലിലെത്തി.
സമരത്തിന് ഐക്യദാര്‍ഢ്യവുമായി വിവിധ സംഘടനകള്‍ സമരപന്തലിലെത്തി. കണ്ണൂരില്‍ നിന്നു പരിസ്ഥിതി പൗരാവകാശ പ്രവര്‍ത്തകര്‍ പയ്യന്നൂര്‍ റെയില്‍വേ സ്റ്റേഷനില്‍ നിന്നു സമരപന്തലിലേക്ക് അനുഭാവപ്രകടനം നടത്തി. ഡോ. ഡി സുരേന്ദ്രനാഥ്, ഇ വിശാലാക്ഷന്‍, അഡ്വ. കസ്തൂരി ദേവന്‍, കെ ദേവദാസന്‍ സംസാരിച്ചു.
 ഡി.സി.സി പ്രസിഡന്റ് സതീശന്‍ പാച്ചേരി, അഡ്വ. നൗഷാദ് വാഴവളപ്പില്‍, പ്രൊഫ. കെ രാജഗോപാലന്‍ സമരപന്തല്‍ സന്ദര്‍ശിച്ചു. പയ്യന്നൂര്‍ സാംസ്‌കാരിക വേദി പ്രവര്‍ത്തകര്‍ ഐക്യദാര്‍ഢ്യവുമായി സമരപന്തലിലെത്തി. പ്രസിഡന്റ് പ്രൊഫ. ബി മുഹമ്മദ് അഹമ്മദ് സംസാരിച്ചു.
സ്ത്രീ കൂട്ടായ്മയുടെ നേതൃത്വത്തില്‍ അനുഭാവ ഉപവാസ സമരം നടത്തി. പി.പി ബാലന്‍, വാസുദേവ ആര്‍ പൈ, ദേവപാര്‍വ്വതി, കെ.എം ഭാനുമതി, കെ.എം സരസ്വതി, കെ.പി ഭാര്‍ഗവി, കെ.വി ദാക്ഷായണി ഉപവാസിച്ചു.
സമരസമിതി രാമന്തളി സെന്‍ട്രലിലേക്ക് മാര്‍ച്ച് നടത്തി. മാധ്യമ പ്രവര്‍ത്തകന്‍ കെ സുനില്‍ കുമാര്‍ സംസാരിച്ചു.