കോഴിക്കോട്: എം.പി ഫണ്ട് ചെലവഴിക്കുന്നതില്‍ ഗുരുതരമായ വീഴ്ചവരുത്തിയ എം.കെ രാഘവന്‍ എം.പി സ്വന്തം കഴിവുകേട് മറച്ചുവയ്ക്കാനുള്ള വിലകുറഞ്ഞ നാടകമാണ് കോഴിക്കോട് കലക്ടറേറ്റില്‍ കാണിച്ചതെന്ന് സി.പി.എം ജില്ലാ കമ്മിറ്റി. മാധ്യമപ്രവര്‍ത്തകരെ മുന്‍കൂട്ടി അറിയിച്ചശേഷം കലക്ടറേറ്റില്‍ എത്തിയ എം.പി സബ്കലക്ടര്‍ ഉള്‍പ്പെടെയുള്ള ഉദ്യോഗസ്ഥന്മാര്‍ക്കുനേരെ ഭീഷണി മുഴക്കുകയായിരുന്നു.
കലക്ടര്‍ സ്ഥലത്തില്ലെന്ന് മനസിലാക്കിയാണ് എം.പി ഈയൊരു നാടകം കളിച്ചതെന്ന് സി.പി.എം ജില്ലാ സെക്രട്ടറി പി. മോഹനന്‍ കുറ്റപ്പെടുത്തി. എം.പി ഫണ്ട് ചെലവഴിക്കുന്നതില്‍ ദയനീയമായി പരാജയപ്പെട്ട രാഘവന്‍ അത് മറച്ചുപിടിക്കാനാണ് ജില്ലാ കലക്ടറെയും ഭരണകേന്ദ്രത്തെയും കുറ്റപ്പെടുത്തുന്ന കഥകള്‍ മാധ്യമങ്ങള്‍ക്കു മുന്നില്‍ വിളമ്പിയതെന്നും പി. മോഹനന്‍ പറഞ്ഞു.