പൂക്കോട്ടുംപാടം: സ്‌കൂള്‍ തുറക്കാന്‍ ദിവസങ്ങള്‍ മാത്രം ബാക്കി നില്‍ക്കെ പൂക്കോട്ടുംപാടം പട്ടക്കരിമ്പിലെ ബദല്‍ സ്‌കൂളിന്റെ മേല്‍ക്കൂര നന്നാക്കാന്‍ നടപടിയില്ല. ഈ വര്‍ഷവും സ്‌കൂള്‍ തുറക്കുന്നത് ചോര്‍ച്ച കാരണം പ്ലാസ്റ്റിക്കിട്ട മേല്‍ക്കൂരയുള്ള കെട്ടിടത്തില്‍.
പാട്ടക്കരിമ്പ് ആദിവാസി കോളനിയിലെ നിരവധി വിദ്യാര്‍ഥികള്‍ക്ക് ആശ്രയമായ ഏക അധ്യാപക വിദ്യാലയമാണ് പാട്ടക്കരിമ്പിലെ ബദല്‍ സ്‌കൂള്‍. ടിന്‍ ഷീറ്റിട്ട് മേഞ്ഞ സ്‌കൂളില്‍ ചോര്‍ച്ച കാരണം പ്ലാസ്റ്റിക്കിട്ട് മേഞ്ഞ നിലയിലാണ്. പാട്ടക്കരിമ്പ് ആദിവാസി കോളനിയോട് ചേര്‍ന്ന് വന ഭൂമിയിലാണ് സ്‌കൂള്‍ സ്ഥിതി ചെയ്യുന്നത്. കോളനിയിലെ മുഴുവന്‍ വിദ്യാര്‍ഥികളും പാട്ടക്കരിമ്പിലെ മറ്റ് കുട്ടികളും ഈ സ്‌കൂളിനെ ആശ്രയിക്കുന്നുണ്ട്.
സൗകര്യ കുറവ് കാരണം മിക്ക രക്ഷിതാക്കളും ഈ സ്‌കൂളിലേക്ക് വിദ്യാര്‍ഥികളെ അയക്കാന്‍ മടിക്കുകയാണ്. വര്‍ണാഭമായ ചുമരുകള്‍ ഒന്നുമില്ലെങ്കിലും നനയാതെ സുരക്ഷിതമായി പഠിക്കാനെങ്കിലുമുള്ള സാഹചര്യം ഒരുക്കാന്‍ സര്‍ക്കാര്‍ തയാറാകണമെന്നാണ് പാട്ടക്കരിമ്പ് ആദിവാസി കോളനിക്കാര്‍ ആവശ്യപ്പെടുന്നത്.