തിരുവനന്തപുരം: അശ്ലീല ഫോണ്ടണ്‍ സംഭാഷണത്തില്‍ കുരുങ്ങി എ.കെ ശശീന്ദ്രന് മന്ത്രിസ്ഥാനം രാജിവയ്‌ക്കേണ്ടിവന്ന സംഭവത്തില്‍ പൊലിസിലും സൈബര്‍ സെല്ലിലും പരാതി.
സംഭവത്തില്‍ സത്യസന്ധമായ അന്വേഷണം നടത്തി ഗൂഢാലോചനയുണ്ടെങ്കില്‍ പുറത്തുകൊണ്ടുവരണമെന്നാവശ്യപ്പെട്ട് പൊതുപ്രവര്‍ത്തകനായ പട്ടം ശശിധരനാണ് ഡി.ജി.പിക്കും സിറ്റി പൊലിസ് കമ്മിഷണര്‍ക്കും ഇന്നലെ രാവിലെ പരാതി നല്‍കിയത്. സംഭവം സംബന്ധിച്ച് പൊതുജനങ്ങളില്‍ സംശയമുണ്ടെന്നും അത് ദൂരീകരിക്കാന്‍ അടിയന്തര അന്വേഷണം നടത്തണമെന്നുമാണ് പരാതിയില്‍ ആവശ്യപ്പെട്ടിരിക്കുന്നത്.
എന്‍.സി.പിയുടെ യുവജന സംഘടനയായ എന്‍.വൈ.സി സംസ്ഥാന പ്രസിഡന്റ് അഡ്വ. മുജീബ് റഹ്മാനാണ് സൈബര്‍ സെല്ലില്‍ പരാതി നല്‍കിയത്. മംഗളം ടെലിവിഷന്‍ ചെയര്‍മാന്‍ സാജന്‍ വര്‍ഗീസ്, സി.ഇ.ഒ ആര്‍ അജിത്കുമാര്‍, കോഡിനേറ്റിങ് എഡിറ്റര്‍മാരായ എം.ബി സന്തോഷ്, ഋഷി കെ മനോജ്, ക്രൈം റിപ്പോര്‍ട്ടര്‍ എസ് ജയചന്ദ്രന്‍, ന്യൂസ് എഡിറ്റര്‍മാരായ ലക്ഷ്മി മോഹന്‍, ഫിറോസ് സാലി മുഹമ്മദ്, എസ്.വി പ്രദീപ്, ഗൂഢാലോചനയില്‍ പങ്കെടുത്ത് ഫോണ്‍ ചെയ്ത സ്ത്രീ എന്നിവരെ പ്രതികളാക്കിയാണ് സൈബര്‍ സ്‌റ്റേഷനില്‍ കേസ് നല്‍കിയത്.
ഫോണ്‍ സംഭാഷണവുമായി ബന്ധപ്പെട്ട് ഇതുവരെ പരാതിയൊന്നും പൊലിസിന് ലഭിച്ചിരുന്നില്ല.
പരാതി ലഭിച്ചതോടെ പൊലിസിന് ഇതേക്കുറിച്ച് അന്വേഷിക്കേണ്ടിവരും. ശശീന്ദ്രന് മന്ത്രിസ്ഥാനം നഷ്ടപ്പെട്ട സംഭവത്തെപ്പറ്റി ആരെങ്കിലും പരാതി നല്‍കിയാല്‍ അന്വേഷിക്കാമെന്നാണ് ആഭ്യന്തര വകുപ്പ് നേരത്തെ വ്യക്തമാക്കിയിരുന്നത്. ജുഡീഷ്യല്‍ അന്വേഷണം പ്രഖ്യാപിച്ചിരിക്കുന്നതിനാല്‍ പൊലിസ് നിയമോപദേശം തേടും.
അന്വേഷിക്കാമെന്ന് നിയമോപദേശം ലഭിച്ചാല്‍ രണ്ടു പരാതികളിലും കേസെടുത്ത് അന്വേഷണം നടത്തും.