കൊച്ചി: മറ്റു സംസ്ഥാനങ്ങള്‍ അതിര്‍ത്തികള്‍ അടയ്ക്കുന്ന സാഹചര്യത്തില്‍ കേരളം ആവശ്യപ്പെട്ടാല്‍ പഴം, പച്ചക്കറി ഉള്‍പ്പെടെ മറ്റ് നിത്യോപയോഗ സാധനങ്ങള്‍ എത്തിക്കുന്നതിന് റെയില്‍വേ തയാറാണെന്ന് തിരുവനന്തപുരം ഡിവിഷനല്‍ കൊമേഴ്‌സ്യല്‍ മാനേജര്‍ ഡോ. രാജേഷ് ചന്ദ്രന്‍ അറിയിച്ചു. 

വിതരണ ശൃംഖലയുടെ സുഗമമായ പ്രവര്‍ത്തനത്തിന് കഴിഞ്ഞ ഒരാഴ്ചയായി 1591 വാഗണുകളിലായി 99929.56 ടണ്‍ ഉത്പന്നങ്ങള്‍ റെയില്‍വേ പാലക്കാട്, തിരുവനന്തപുരം ഡിവിഷനുകളിലേക്ക് എത്തിച്ചെന്നും അദ്ദേഹം പറഞ്ഞു. 

ഇന്നത്തെ സാഹചര്യത്തില്‍ സംസ്ഥാനങ്ങളെല്ലാം അതിര്‍ത്തികള്‍ അടച്ചിട്ട നിലയിലാണുള്ളത്. അതുകൊണ്ടുതന്നെ കേരളത്തില്‍ നിന്ന് റോഡ് മാര്‍ഗം അവശ്യസാധനങ്ങള്‍ എത്തിക്കുക ഏറെ ശ്രമകരമാണ്. സംസ്ഥാനങ്ങള്‍ കടന്നുപോകണമെങ്കില്‍ ആരോഗ്യ പരിശോധനയും സെല്‍ഫ് ഡിക്ലറേഷനും കഴിഞ്ഞ് വാഹനം തിരികെ എത്തുമ്പോഴേക്കും സമയം അധികരിക്കും. പഴം, പച്ചക്കറികള്‍ ഇങ്ങനെ എത്തിക്കുമ്പോള്‍ ഗുണനിലവാരത്തിലും പ്രശ്‌നങ്ങള്‍ ഉണ്ടായേക്കാം.

ഉപ്പുതൊട്ട് കര്‍പ്പൂരം വരെ എത്തിക്കാന്‍ മറ്റ് സംസ്ഥാനങ്ങള്‍ റെയില്‍വേയെ ആണ് പ്രധാനമായും ആശ്രയിക്കുന്നത്. അതുകൊണ്ടുതന്നെ അവശ്യസാധന ലഭ്യതക്കുറവ് ആ സംസ്ഥാനങ്ങള്‍ക്ക് പ്രതിസന്ധിയാവില്ലെന്നും ആവശ്യപ്പെട്ടാല്‍ കേരളത്തിലും ഇത്തരം സാധനങ്ങള്‍ എത്തിക്കുന്നത് റെയില്‍വേ സന്തോഷപൂര്‍വം ഏറ്റെടുക്കാന്‍ തയാറാണെന്നും രാജേഷ് ചന്ദ്രന്‍ പറഞ്ഞു. കേരളത്തിലെ എഫ്.സി.ഐ സ്റ്റോറേജുകളിലേക്കാണ് അരിയും ഗോതമ്പും എത്തിക്കുന്നത്. അവിടെനിന്നാണ് അവ പൊതുവിപണിയിലേക്കെത്തുക. പാലക്കാട് ഡിവിഷനില്‍ 49938.89 ടണ്‍ ഉത്പന്നങ്ങള്‍ 806 വാഗണുകളിലായി എത്തിച്ചപ്പോള്‍ ഈ ഒരാഴ്ചയ്ക്കകം തൃശൂര്‍ വള്ളത്തോള്‍ നഗര്‍ മുതല്‍ തിരുനെല്‍വേലി വരെയുള്ള തിരുവനന്തപുരം ഡിവിഷനില്‍ എത്തിയത് 785 വാഗണുകളിലായി 49990.67 ടണ്‍ ഉത്പന്നങ്ങളാണ്.പുഴുക്കലരി, പച്ചരി, ഗോതമ്പ് എന്നിവ കൂടാതെ പെട്രോളിയം ഉത്പ്പന്നങ്ങളാണ് എത്തിച്ചതില്‍ ഭൂരിഭാഗവും. 

അയ്യായിരം ടണ്‍ കാലിത്തീറ്റ ചാലക്കുടിയിലും എത്തിച്ചിട്ടുണ്ട്. മറ്റ് ഭക്ഷ്യ ധാന്യങ്ങള്‍ക്കും ഉപ്പ്, പഞ്ചസാര, പാല്‍, ഭക്ഷ്യഎണ്ണ, ഉള്ളി, പഴങ്ങള്‍, പച്ചക്കറികള്‍ എന്നിവയ്ക്ക് കേരളം റോഡ് ഗതാഗതത്തെ ആശ്രയിക്കാറാണ് പതിവെന്നതിനാല്‍ത്തന്നെ റെയില്‍വേയ്ക്ക് ഇത്തരം ഓര്‍ഡറുകള്‍ ലഭിച്ചിട്ടില്ല. 

കഴിഞ്ഞ നാലുദിവസമായി ഏകദേശം 1.6 ലക്ഷം  വാഗണുകളാണ് വിതരണ ശൃംഖലയുടെ പ്രവര്‍ത്തനത്തിനായി വിവിധ ഉത്പന്നങ്ങള്‍ രാജ്യമെമ്പാടും എത്തിച്ചത്. ഇതില്‍ തന്നെ ഒരു ലക്ഷത്തിലധികം വാഗണുകളില്‍  അവശ്യവസ്തുക്കള്‍ മാത്രമായിരുന്നു. 

വിവിധ സംസ്ഥാനങ്ങള്‍ ലോക്ക്ഡൗണിലായതിനാല്‍  റെയില്‍വേ ഉദ്യോഗസ്ഥര്‍ വിവിധ ഗുഡ്‌സ് ഷെഡുകളിലും  സ്‌റ്റേഷനുകളിലും കണ്‍ട്രോള്‍ ഓഫിസുകളിലും 24 മണിക്കൂറും പ്രവര്‍ത്തി ചെയ്താണ് അവശ്യ വസ്തുക്കളുടെ വിതരണം ഉറപ്പു വരുത്തുന്നത്.സംസ്ഥാനാതിര്‍ത്തി മറ്റ് സംസ്ഥാനങ്ങള്‍ അടച്ചിട്ടിരിക്കുന്ന സ്ഥിതി ഉള്ളതിനാല്‍ അവശ്യസാധന ലഭ്യതക്കുറവ് വരും ദിവസങ്ങളില്‍ കേരളത്തില്‍ പ്രകടമാവും. ഈ സാഹചര്യത്തില്‍ റെയില്‍വെയുടെ സഹായം തേടാന്‍ സംസ്ഥാന സര്‍ക്കാര്‍ ശ്രമിക്കാത്തതെന്തെന്ന ചോദ്യമാണ് ബാക്കിയാവുന്നത്.