കാബൂള്‍: അമേരിക്ക ഇടപെട്ടതിനെ തുടര്‍ന്ന് അഫ്ഗാന്‍ സര്‍ക്കാര്‍ രൂപീകരിച്ച ഉദ്യോഗസ്ഥ സംഘവുമായി ചര്‍ച്ചയ്ക്കു വിസമ്മതിച്ച് താലിബാന്‍. ഇന്നലെ താലിബാന്‍ വക്താവ് സബീഹുല്ലാഹ് മുജാഹിദാണ് ഇക്കാര്യം വ്യക്തമാക്കിയത്.
അമേരിക്കയുമായി താലിബാന്‍ ഒപ്പിട്ട സമാധാന കരാറുമായി ബന്ധപ്പെട്ട കാര്യങ്ങളില്‍ നേരത്തെ അഫ്ഗാന്‍ സര്‍ക്കാരും താലിബാനും തമ്മില്‍ ഭിന്നാഭിപ്രായങ്ങളുണ്ടായിരുന്നു.
ഇരുപക്ഷത്തെയും തടവുകാരെ വിട്ടയയ്ക്കുമെന്നായിരുന്നു അമേരിക്കയുമായുള്ള കരാറിലുണ്ടായിരുന്നത്. എന്നാല്‍, താലിബാന്‍ തടവുകാരെ തങ്ങള്‍ വിട്ടയയ്ക്കില്ലെന്ന നിലപാടിലായിരുന്നു അഫ്ഗാന്‍ സര്‍ക്കാര്‍. അമേരിക്കയും താലിബാനുമായുള്ള കരാര്‍ തങ്ങളെ ബാധിക്കില്ലെന്നും അഫ്ഗാന്‍ വ്യക്തമാക്കിയിരുന്നു. ഇതേ തുടര്‍ന്ന് അഫ്ഗാനില്‍ താലിബാന്‍ വീണ്ടും ആക്രമണങ്ങള്‍ നടത്തി. ഇതോടെ നിബന്ധനകള്‍ക്കു വിധേയമായി ഘട്ടംഘട്ടമായി തടവുകാരെ വിട്ടയയ്ക്കാമെന്ന നിലപാടുമായി അഫ്ഗാന്‍ രംഗത്തെത്തി. എന്നാല്‍, നിബന്ധനകള്‍ താലിബാന്‍ തള്ളിയതോടെ വീണ്ടും സംഘര്‍ഷമായി. ഇതോടെയാണ് അമേരിക്ക ഇടപെട്ടിരുന്നത്.
തുടര്‍ന്ന് 21 അഗം സംഘത്തെയാണ് താലിബാനുമായുള്ള ചര്‍ച്ചയ്ക്ക് അഫ്ഗാന്‍ സര്‍ക്കാര്‍ നിയോഗിച്ചിരുന്നത്. സമാധാന കരാര്‍ അഫ്ഗാന്‍ പാലിക്കണമെന്നാണ് താലിബാന്റെ ആവശ്യം. കഴിഞ്ഞ ദിവസം അഫ്ഗാനിലെ കാബൂളില്‍ സിഖ് ഗുരുദ്വാരയിലുണ്ടായ ഭീകരാക്രമണത്തില്‍ നിരവധി പേര്‍ കൊല്ലപ്പെട്ടിരുന്നു. ഇതില്‍ തങ്ങള്‍ക്കു പങ്കില്ലെന്നു താലിബാന്‍ വ്യക്തമാക്കിയതിനു പിന്നാലെ ആക്രമണത്തിന്റെ ഉത്തരവാദിത്തമേറ്റെടുത്ത് ഐ.എസ് രംഗത്തെത്തിയിരുന്നു.