അരീക്കോട്: ഭിന്നശേഷിക്കാരായ കുട്ടികളുടെ ഉന്നമനത്തിന് സ്വപ്നക്കൂട് പദ്ധതിക്ക് പരിഗണന നല്‍കി അരീക്കോട് ഗ്രാമ പഞ്ചായത്ത് ബജറ്റ്. ഭിന്നശേഷിക്കാരുടെ ചികിത്സ, വിദ്യഭ്യാസം, പുനരധിവാസം എന്നിവ ലക്ഷ്യമിട്ടാണ് ബഡ്‌സ് സ്‌കൂള്‍ പ്രവര്‍ത്തനമാരംഭിക്കുക. ഇതിനു പുറമെ ചാലിയാര്‍ മുഴിക്കല്‍ ടൂറിസം പദ്ധതി, ഫയര്‍ സ്റ്റേഷന്‍, യൂനാനി ഹോസ്പിറ്റല്‍, ഡയാലിസിസ് കേന്ദ്രം എന്നിവക്കും പരിഗണന നല്‍കുന്ന ബജറ്റാണ് വൈസ് പ്രസിഡന്റ് എ.ഡബ്ലിയു അബ്ദുറഹ്മാന്‍ അവതരിപ്പിച്ചത്. കായികക്ഷമത ലക്ഷ്യമിട്ട് കൊണ്ട് പഞ്ചായത്തിലെ സ്‌റ്റേഡിയങ്ങള്‍ നവീകരിക്കാനും നീന്തല്‍ പരിശീലന കേന്ദ്രങ്ങള്‍ സ്ഥാപിക്കാനും ബജറ്റില്‍ തുക നീക്കി വെച്ചിട്ടുണ്ട്. പഞ്ചായത്ത് പ്രസിഡന്റ് അമ്പാഴത്തിങ്ങല്‍ മുനീറ അധ്യക്ഷയായി. അബൂബക്കര്‍ സിദ്ദീഖ്, എ.എം ഷാഫി, ഉമര്‍ വെള്ളേരി, ശിഹാബുദ്ദീന്‍ പാറക്കല്‍, എ. ഷീന, സറീന ജാഫര്‍, കെ. ഭാസ്‌കരന്‍ തുടങ്ങിയവര്‍ സംസാരിച്ചു.