നാദാപുരം: നടപ്പുവര്‍ഷം ജില്ലാ പഞ്ചായത്ത് ഫണ്ടില്‍ നിന്നും നാദാപുരം ഡിവിഷനില്‍ രണ്ടുകോടി 57 ലക്ഷം രൂപയുടെ വികസന പ്രവര്‍ത്തനം നടപ്പിലാക്കുമെന്ന് ജില്ലാ പഞ്ചായത്ത് അംഗം അഹമ്മദ് പുന്നക്കല്‍ വാര്‍ത്താ സമ്മേളനത്തില്‍ അറിയിച്ചു.
നാദാപുരത്തെ പ്രധാന ബൈപ്പാസ് റോഡായ ആവോലം കല്ലാച്ചി റോഡിനു 55 ലക്ഷം രൂപയാണ് അനുവദിച്ചത്. വളയം, വാണിമേല്‍ പഞ്ചായത്തുകളെ ബന്ധിപ്പിക്കുന്ന കണിയോത്ത് മുക്ക് ചെറുമോത്ത് റോഡിന് 34 ലക്ഷവും, പുതുക്കുടി ഓണപ്പറമ്പ് റോഡിന് 15 ലക്ഷവും അനുവദിച്ചിട്ടുണ്ട്.
വളയം പഞ്ചായത്തില്‍ കുറ്റിക്കാട്ടില്‍ കുയ്‌തേരി റോഡിന് 30 ലക്ഷം, ചെക്ക്യാട് വില്ലേജ് ഓഫിസ് പുളിയാവ് റോഡിന് 15 ലക്ഷം, പുളിയാവ് കുട്ടിപ്പാറ മുക്ക് റോഡിന് 8 ലക്ഷം, ജാതിയേരി വയലോളി താഴ റോഡിന് 10 ലക്ഷം, വളയം ഹൈസ്‌കൂള്‍ ചുറ്റുമതില്‍ നിര്‍മാണത്തിന് 20 ലക്ഷം, കല്ലാച്ചി ഗവ. ഹയര്‍ സെക്കന്‍ഡറി സ്‌കൂള്‍ കെട്ടിട നിര്‍മാണത്തിന് 30 ലക്ഷം, കല്ലാച്ചി ഹയര്‍ സെക്കന്‍ഡറി സോളാര്‍ പ്ലാന്റിന് 10 ലക്ഷം, കല്ലാച്ചി ഗവ. കമേഴ്‌സ്യല്‍ ഇന്‍സ്റ്റിറ്റ്യൂട്ട് അറ്റകുറ്റ പണികള്‍ക്കായി 10 ലക്ഷം, പുളിയാവ് കുടിവെള്ള പദ്ധതിക്ക് 10 ലക്ഷം, വിഷ്ണുമംഗലം കുടിവെള്ള പദ്ധതിക്ക് 10 ലക്ഷം എന്നിങ്ങനെയാണ് തുക അനുവദിച്ചത്. നാദാപുരം പ്രസ്‌ക്ലബില്‍ വിളിച്ചു ചേര്‍ത്ത വാര്‍ത്താ സമ്മേളനത്തില്‍ ബ്ലോക്ക് പഞ്ചായത്ത് അംഗം മണ്ടോടി ബഷീര്‍ മാസ്റ്ററും പങ്കെടുത്തു.