ഗാന്ധിനഗര്‍ (കോട്ടയം): കൊവിഡ് 19 രോഗബാധിതരായി കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയില്‍ കഴിഞ്ഞിരുന്ന വയോധികരെ ഡിസ്ചാര്‍ജ്ജ് ചെയ്‌തെങ്കിലും വയോധികന്റെ രക്തസമ്മര്‍ദം താഴ്ന്നതിനെ തുടര്‍ന്ന് രണ്ടു ദിവസം കൂടി നിരീക്ഷണത്തില്‍.
കൊവിഡ് 19 ബാധിച്ച് മെഡിക്കല്‍ കോളജ് ആശുപത്രിയില്‍ ചികിത്സയില്‍ കഴിഞ്ഞിരുന്ന റാന്നി ഐത്തല സ്വദേശികളായ വയോധികരായ ദമ്പതികളുടെ നാലാംഘട്ട പരിശോധന ഫലം നെഗറ്റീവ് ആയിരുന്നു. തിങ്കളാഴ്ച ലഭിച്ച പരിശോധന ഫലം നെഗറ്റീവ് ആയതിനെ തുടര്‍ന്ന് ഇന്നലെ ഡിസ്ചാര്‍ജ്ജ് ചെയ്യാന്‍ തീരുമാനിച്ചു. രാവിലെ മെഡിക്കല്‍ ബോര്‍ഡ് കൂടുകയും 11 ന് ഡിസ്ചാര്‍ജ്ജ് ചെയ്യുകയും ചെയ്തു. വീട്ടിലേയ്ക്ക് കൊണ്ടു പോകുന്നതിന് ആരോഗ്യ വകുപ്പ് ആംബുലന്‍സ് ക്രമീകരിക്കുകയും ചെയ്തു.
ഇവരുടെ മകനും ഭാര്യയും മറ്റ് ബന്ധുക്കളും കൊവിഡ് 19 വിമുക്തരായി പത്തനംതിട്ട ജനറല്‍ ആശുപത്രിയില്‍ നിന്നും തിങ്കളാഴ്ച വീട്ടിലേയ്ക്ക് പോയപ്പോള്‍ ആശുപത്രി അധികൃതരും ജീവനക്കാരും ആഘോഷപൂര്‍വമാണ് വിട്ടയച്ചത്. ഹൃദ്രോഗമുള്ളതിനാല്‍ ഇതു പോലുള്ള യാത്രയയപ്പ് വേണ്ടെന്ന് അധികൃതര്‍ തീരുമാനിച്ചു. എന്നാല്‍ വീട്ടിലേക്ക് പോകാനുള്ള ക്രമീകരണങ്ങള്‍ പൂര്‍ത്തിയാക്കിയപ്പോഴാണ് വയോധികന്റെ രക്തസമ്മര്‍ദത്തിന് വ്യത്യാസം വന്നത്. തുടര്‍ന്ന് അടിയന്തര മെഡിക്കല്‍ ബോര്‍ഡ് ചേര്‍ന്ന് രണ്ട് ദിവസം കൂടി നിരീക്ഷണത്തില്‍ കിടത്തിയ ശേഷം വീട്ടിലേയ്ക്ക് വിടാന്‍ തീരുമാനിക്കുകയായിരിന്നു. എന്നാല്‍ മറ്റ് തരത്തിലുള്ള ആശങ്ക വേണ്ടെന്ന് അധികൃതര്‍ അറിയിച്ചു.