കൊച്ചി: കപ്പല്‍ശാലയുടെ ഓഹരികള്‍ വില്‍ക്കുന്നതിനെതിരേ തൊഴിലാളി സംഘടനകള്‍ രംഗത്ത്.
ഓഹരികള്‍ വിറ്റഴിച്ച് കപ്പല്‍ശാലയെ സ്വകാര്യവല്‍ക്കരിക്കുന്നതിനെതിരേ പ്രക്ഷോഭ പരിപാടികളുമായി മുന്നോട്ടു പോകുമെന്ന് കൊച്ചിന്‍ ഷിപ്‌യാര്‍ഡ് ജോയിന്റ് ആക്ഷന്‍ ഫ്രണ്ട് ഭാരവാഹികള്‍ വാര്‍ത്താ സമ്മേളനത്തില്‍ പറഞ്ഞു. കപ്പല്‍ശാലയുടെ ഓഹരികള്‍ വില്‍ക്കാന്‍ വികസന പ്രവര്‍ത്തനങ്ങള്‍ മുന്‍നിര്‍ത്തി പ്രചാരണ പരിപാടി നടത്താനാണ് സര്‍ക്കാര്‍ ശ്രമിക്കുന്നത്.
എന്നാല്‍ കപ്പല്‍ശാലയുടെ നീക്കിയിരിപ്പ് തുക അടുത്ത അഞ്ചു വര്‍ഷം കൊണ്ട് 1500 കോടി രൂപ കൂടി രൂപയാക്കി ഉയര്‍ത്താന്‍ കഴിയുമെന്നും ഭാരവാഹികള്‍ പറഞ്ഞു.
കപ്പല്‍ശാലയുടെ ഓഹരികള്‍ വില്‍ക്കാതെ തന്നെ വികസന പ്രവര്‍ത്തനങ്ങള്‍ നടപ്പിലാക്കുന്നതിന് വിവിധ നിര്‍ദേശങ്ങളും ജോയിന്റ് ആക്ഷന്‍ ഫ്രണ്ട് മുന്നോട്ടുവച്ചു. കപ്പല്‍ശാലയുടെ ഓഹരികള്‍ വിറ്റഴിക്കുന്നതിനെതിരേ പൊതുജനങ്ങളെ ബോധവല്‍ക്കരിക്കുകയായിരിക്കും ആദ്യ നടപടിയെന്നും ഭാരവാഹികള്‍ അറിയിച്ചു.
വാര്‍ത്താ സമ്മേളനത്തില്‍ കൊച്ചിന്‍ ഷിപ്‌യാര്‍ഡ് എംപ്ലോയീസ് ഓര്‍ഗനൈസേഷന്‍ (ഐ.എന്‍.ടി.യു.സി) ജനറല്‍ സെക്രട്ടറി അഡ്വ. എം. ലിജു, കൊച്ചിന്‍ ഷിപ്‌യാര്‍ഡ് എംപ്ലോയീസ് ഫെഡറേഷന്‍ (സി.ഐ.ടി.യു) പ്രസിഡന്റ് പി. രാജീവ്, ജനറല്‍ സെക്രട്ടറി എം. അനില്‍കുമാര്‍, എ.കെ കിഷോര്‍, അഡ്വ. ജോണ്‍ ലൂക്കോസ്, എ.പി ഉദയകുമാര്‍ സംബന്ധിച്ചു.