സ്വന്തം ലേഖകന്‍

കൊച്ചി: കൈകൊണ്ടു തൊടാതെ സോപ്പെടുക്കാം. കൈമുട്ടുകൊണ്ട് ടാപ്പ് തിരിച്ച് വെള്ളവുമെടുക്കാം. കൊച്ചി ആസ്ഥാനമായ ദക്ഷിണ മേഖലാ നാവിക കമാന്‍ഡ് ആണ് തദ്ദേശിയമായി ഇത് നിര്‍മിച്ചത്. ഇത്തരത്തില്‍ എട്ട് യൂണിറ്റുകള്‍ നിര്‍മിച്ച് എറണാകുളം ജില്ലാ ഭരണകൂടത്തിന് കൈമാറിയിട്ടുമുണ്ട്.

വലിയ വാട്ടര്‍ടാങ്ക്, വാഷ്‌ബേസിന്‍, ടാപ്പ്, സോപ്പ്‌സാനിറ്റൈസര്‍ ഇത്രയും അടങ്ങുന്നതാണ് ഒരു ഹാന്‍ഡ് സാനിറ്റൈസര്‍ യൂണിറ്റ്. കൈ കഴുകേണ്ടപ്പോള്‍ സോപ്പ് സാനിറ്റൈസര്‍ കൈകൊണ്ട് ഞെക്കി എടുക്കുന്നതിനു പകരം താഴെ ഉറപ്പിച്ചിട്ടുള്ള പമ്പില്‍ കാല്‍കൊണ്ട് പ്രസ് ചെയ്യുകയാണ് വേണ്ടത്. ഇങ്ങനെ കൈതൊടുന്നത് ഒഴിവാക്കി സോപ്പ് സാനിറ്റൈസര്‍ ആവശ്യാനുസരണം എടുക്കാം. കൈയില്‍  നന്നായി സാനിറ്റൈസര്‍ പുരട്ടിയശേഷം ടാപ്പില്‍നിന്ന് വെള്ളമെടുക്കാം. 

ഈ ടാപ്പിന്റെ ഇരുവശത്തേക്കും അരയടിയോളം നീളത്തില്‍ കമ്പികള്‍ ഉറപ്പിച്ചിട്ടുണ്ട്. ഈ കമ്പികള്‍ കൈമുട്ട് ഉപയോഗിച്ച് തിരിച്ചാല്‍ മതി. കൈതൊടാതെ വെള്ളവും ലഭ്യമാവും. കൈ കഴുകിയശേഷവും കൈമുട്ടുകൊണ്ടുതന്നെ ആയാസരഹിതമായി ടാപ്പ് അടയ്ക്കുകയും ചെയ്യാം.

നാവികസേനയുടെ ഷിപ്പ്‌യാര്‍ഡിലാണ് ഉപയോഗശൂന്യമായ സ്പ്രിങ്, കണ്ടെയ്‌നറുകള്‍ തുടങ്ങിയവ ഉപയോഗിച്ച് ഇത്തരം യൂണിറ്റുകള്‍ നിര്‍മിച്ചിരിക്കുന്നത്. ഇത്തരത്തില്‍ 30 യൂണിറ്റുകള്‍ നിര്‍മിച്ചു നല്‍കാന്‍ ജില്ലാ ഭരണകൂടം നാവികസേനയോട് അഭ്യര്‍ഥിച്ചിരിക്കുകയാണ്.