പട്‌ന: സഹപ്രവര്‍ത്തകയെ നിയമസഭയിലെ സന്ദര്‍ശക മുറിയില്‍ ലൈംഗികമായി പീഡിപ്പിച്ച ബി.ജെ.പി നേതാവിന് സസ്‌പെന്‍ഷന്‍. ബിഹാറിലെ ബി.ജെ.പി എം.എല്‍സിയും പാര്‍ട്ടി വൈസ് പ്രസിഡന്റുമായ ലാല്‍ ബാബു പ്രസാദിനെയാണ് പാര്‍ട്ടി സസ്‌പെന്‍ഡ് ചെയ്തത്. ഇയാള്‍ ലോക്ജനശക്തി പാര്‍ട്ടിയിലെ എം.എല്‍.സിയായ നുതന്‍ സിങിനെയാണ് പീഡിപ്പിച്ചത്. ഇവരുടെ ഭര്‍ത്താവും ബി.ജെ.പി എം.എല്‍.എയുമായ നീരജ് കുമാര്‍ സിങ് ബബ്‌ലുവിനോട് പറഞ്ഞതിനെ തുടര്‍ന്ന് നിയമസഭയില്‍ കൈയാങ്കളിയായി.
സംഭവത്തില്‍ പാര്‍ട്ടി എം.എല്‍.എമാരുടെ മുന്നില്‍ വച്ച് ലാല്‍ ബാബുവിനെ നീരജ് കുമാര്‍ മര്‍ദിച്ചു. തുടര്‍ന്ന് നിയമസഭാ ചെയര്‍മാന് പരാതി നല്‍കുകയും ചെയ്തു. ബി.ജെ.പിയുടെ മുന്‍ ഉപമുഖ്യമന്ത്രി സുശീല്‍ കുമാര്‍ മോദി ഇടപെട്ടാണ് രംഗം ശാന്തമാക്കിയത്. അതേസമയം വിഷയം ലാഘവത്തോടെ കൈകാര്യം ചെയ്തതിന് ബിഹാര്‍ ഉപമുഖ്യമന്ത്രി തേജസ്വി യാദവ് ബി.ജെ.പിയെ വിമര്‍ശിച്ചു.