കൊച്ചി: കൊവിഡുമായി ബന്ധപ്പെട്ട് ബാങ്ക് വായ്പകള്‍ക്ക് മൊറട്ടോറിയം ഏര്‍പ്പെടുത്തിയാലും പലിശ അടയ്ക്കണമെന്ന് ബാങ്കുകള്‍. ഇക്കാര്യം ചൂണ്ടിക്കാട്ടി ഇടപാടുകാര്‍ക്ക് ബാങ്കുകള്‍ സന്ദേശം അയച്ചു തുടങ്ങി. ലോക്ക്ഡൗണ്‍ നിലനില്‍ക്കുന്നതിനാലും കൊവിഡ് 19 വ്യാപന പശ്ചാത്തലത്തിലുമാണ് ബാങ്ക് വായ്പ തിരിച്ചടവിന് സാവകാശം നല്‍കുന്നതിനുവേണ്ടി റിസര്‍വ് ബാങ്ക് മൂന്നുമാസത്തെ മൊറട്ടോറിയം പ്രഖ്യാപിച്ചത്. ഈ കാലയളവില്‍ പ്രതിമാസ വായ്പ തുകയും പലിശയും അടയ്ക്കുന്നതില്‍ ഇടപാടുകാര്‍ക്ക് സാവകാശം നല്‍കാനായിരുന്നു ഇത്.

 

എന്നാല്‍, വായ്പ അടയ്ക്കാതിരിക്കുന്ന കാലയളവിലും യഥാര്‍ഥ വായ്പ തുകയിന്‍മേല്‍ അതത് മാസം ഏര്‍പ്പെടുത്തിയിരിക്കുന്ന പലിശത്തുക (പലിശമാത്രം) മൂന്നുമാസം കഴിയുമ്പോള്‍ ഒന്നിച്ചടയ്ക്കണമെന്നാണ് ബാങ്കുകള്‍ നിഷ്‌കര്‍ഷിക്കുന്നത്. വായ്പാ കാലാവധി മൂന്നു മാസം കൂടി നീട്ടി കിട്ടുകയും മാര്‍ച്ച്, ഏപ്രില്‍, മെയ്  മാസങ്ങളില്‍ ഇടപാടു നടത്തേണ്ടെന്നതുമാണ് മൊറട്ടോറിയത്തിലൂടെ ഇടപാടുകാര്‍ക്ക് ലഭിക്കുന്ന ആശ്വാസമെന്നാണ് ഇത്തരം ബാങ്കുകളുടെ വിശദീകരണം.

 

പലിശ മൂന്നു മാസം അടക്കുന്നില്ലെങ്കിലും പിഴപലിശ ഈടാക്കില്ല.  അതായത്, മൂന്നുമാസം കഴിഞ്ഞ് തവണയടയ്ക്കാന്‍ ചെല്ലുമ്പോള്‍ മൊറട്ടോറിയം കാലയളവില്‍ തുക അടച്ചിരുന്നില്ലെങ്കിലും അക്കാലയളവിലുള്ള പലിശ (മൂന്നുമാസത്തെ) വസൂലാക്കാനാണ് ബാങ്കുകളുടെ നീക്കം. അതേസമയം, വായ്പ കാലാവധി മൂന്നുമാസം കൂടി ദീര്‍ഘിപ്പിക്കുമ്പോള്‍ ആ കാലയളവിലും പലിശ അടയ്‌ക്കേണ്ടിവരുമെന്നാണ് സൂചന. എന്നാല്‍ പല ബാങ്കുകളും ഇക്കാര്യത്തില്‍ വ്യത്യസ്ത നിലപാടാണ് കൈക്കൊള്ളുന്നതെന്നും അറിയുന്നു. ചുരുക്കം ചില ബാങ്കുകള്‍ മൊറട്ടോറിയം കാലയളവിലെ പലിശ ഒഴിവാക്കുവെന്നും വ്യക്തമാക്കിയിട്ടുണ്ട്.

 

ബാങ്ക് ഇടപാടുകളുമായി ഏറെയൊന്നും ബന്ധമില്ലാത്തവരും മറ്റും ബാങ്കുകളുടെ ഇത്തരം സാങ്കേതിക നടപടികളില്‍ വിയര്‍ക്കും. ഇക്കാര്യങ്ങളിലൊന്നും വിശദീകരണങ്ങള്‍ വരാത്ത സാഹചര്യത്തില്‍ പണമുള്ളവര്‍ മൊറട്ടോറിയത്തിനു നില്‍ക്കാതെ വായ്പത്തുക അടയ്ക്കുന്നതാണ് നല്ലതെന്നാണ് സാമ്പത്തിക വിദഗ്ധര്‍ നിര്‍ദേശിക്കുന്നത്.മൊറട്ടോറിയം വായ്പ തിരിച്ചടവിലെ സാവകാശം മാത്രമാണ്.

 

വ്യവസ്ഥകള്‍ ഒന്നുംതന്നെ മാറുന്നില്ല. മൊറട്ടോറിയം 'ആവശ്യമുള്ളവര്‍' അറിയിക്കണമെന്ന് ചില ബാങ്കുകള്‍ നിര്‍ദേശിക്കുമ്പോള്‍ മൊറട്ടോറിയം 'വേണ്ടാത്തവര്‍' അറിയിക്കണമെന്നാവശ്യപ്പെടുന്ന ബാങ്കുകളും ഇതുവരെ 'മനസ് തുറക്കാത്ത' ബാങ്കുകളും ഉണ്ട്.മാസം തോറും നിശ്ചിത തീയതിയില്‍ അക്കൗണ്ടില്‍ നിന്ന് നേരിട്ട് ഇ.എം.ഐ അടയ്ക്കുന്നവര്‍ക്ക് മൊറട്ടോറിയം ആനുകൂല്യം വേണമെങ്കില്‍ അതത് ബാങ്ക് ശാഖകളെ അറിയിക്കേണ്ടതുണ്ട്. ഇമെയില്‍, മൊബൈല്‍ ഫോണ്‍ എന്നിവ വഴിയോ നേരിട്ട് ബാങ്കിനെ സമീപിക്കുകയോ ആണ് വേണ്ടത്.മാര്‍ച്ച് ഒന്നുമുതല്‍ മെയ് ഒന്നുവരെയാണ് മൊറട്ടോറിയം പ്രഖ്യാപിച്ചിരിക്കുന്നത്. അതിനാല്‍ ജൂണ്‍ ഒന്നുമുതല്‍ തവണ പുനരാരംഭിച്ചാല്‍ മതിയാവും. 

 

മൊറട്ടോറിയം ബാങ്ക് ഉള്‍പ്പെടെ എല്ലാത്തരം വായ്പാദാതാക്കളെയും ഉദ്ദേശിച്ചുള്ളതാണ്. ഭവന, കാര്‍ഷിക, വാഹന, വിള വായ്പകളും റീട്ടെയ്ല്‍ വായ്പകളുള്‍പ്പെടെ നിശ്ചിത പരിധിയിലുള്ള എല്ലാ വായ്പകളും ക്രെഡിറ്റ് കാര്‍ഡ് വായ്പയും ഇതിന്റെ പരിധിയില്‍ വരും.