കുവൈത്ത് സിറ്റി: ആത്മഹത്യക്ക് ശ്രമിച്ച വീട്ടുജോലിക്കാരിയെ രക്ഷിക്കാതെ മൊബൈലില്‍ പകര്‍ത്തിയ യുവതിയെ പൊലിസ് അറസ്റ്റ് ചെയ്തു. എത്യോപ്യന്‍ വീട്ടുജോലിക്കാരിയാണ് ഏഴുനില കെട്ടിടത്തില്‍നിന്ന് വീണത്. ആത്മഹത്യാശ്രമം നടത്തിയ ഇവരെ വീട്ടുടമയായ യുവതി രക്ഷിക്കാന്‍ ശ്രമിക്കുന്നതിനു പകരം ചാടുന്ന വിഡിയോ മൊബൈലില്‍ പകര്‍ത്തുകയായിരുന്നു. തുടര്‍ന്ന് ഇത് സമൂഹമാധ്യമങ്ങളില്‍ പോസ്റ്റ് ചെയ്യുകയും ചെയ്തു.
ഇതുസംബന്ധിച്ച പത്രവാര്‍ത്തയും പൗരാവകാശ പ്രവര്‍ത്തകരുടെ പരാതിയുടെയും അടിസ്ഥാനത്തിലാണ് പൊലിസ് കേസെടുത്തത്. ഏഴുനില കെട്ടിടത്തില്‍ തൂങ്ങിനില്‍ക്കുന്ന യുവതിയുടെ 12 സെക്കന്‍ഡ് വിഡിയോയാണ് ഇവര്‍ സമൂഹമാധ്യമങ്ങളില്‍ പോസ്റ്റ് ചെയ്തത്. ഒരു കൈ കൊണ്ട് കെട്ടിടത്തിന്റെ ജനലില്‍ അള്ളിപ്പിടിച്ചു നിന്ന യുവതി അവസാന നിമിഷത്തില്‍ മറു കൈ ഉയര്‍ത്തി രക്ഷയ്ക്കു വേണ്ടി യാചിക്കുന്നുണ്ട്.
എന്നാല്‍, ഈ സമയവും വീട്ടുടമസ്ഥ രംഗം ചിത്രീകരിക്കുകയായിരുന്നു. വീട്ടുജോലിക്കാരി ആത്മഹത്യാശ്രമം നടത്തിയത് എന്തിനാണെന്നു വ്യക്തമല്ല. പൊലിസ് അറസ്റ്റ് ചെയ്ത യുവതിയെ പ്രോസിക്യൂഷന് കൈമാറി.