കോഴിക്കോട്: മില്‍മ വഴിയുള്ള പാല്‍ സംഭരണത്തിലെ പ്രതിസന്ധിക്കു പരിഹാരം. ഇന്നു മുതല്‍ ക്ഷീരകര്‍ഷകരില്‍ നിന്ന് മുഴുവന്‍ പാലും സംഭരിക്കും. ദിനംപ്രതി 50,000 ലിറ്റര്‍ പാല്‍ പൊടിയാക്കി സൂക്ഷിക്കും. ബാക്കി വരുന്ന പാല്‍ അതിഥി തൊഴിലാളികളുടെ ക്യാംപുകളിലും അങ്കണവാടികളിലെ കുട്ടികള്‍ക്കും വിതരണം ചെയ്യും. ജില്ലാ കലക്ടര്‍മാര്‍ക്ക് ഇതുസംബന്ധിച്ച് നിര്‍ദേശം നല്‍കിയതായി ക്ഷീരവികസന മന്ത്രി കെ. രാജു അറിയിച്ചു.

തമിഴ്‌നാട് മില്‍ക്ക് ഫെഡറേഷന്റെ ഈറോഡുള്ള ഫാക്ടറിയില്‍ പാലെത്തിച്ചാണ് പൊടിയാക്കി മാറ്റുക. മുഖ്യമന്ത്രിയുടെ നേതൃത്വത്തില്‍ നടന്ന ഇടപെടലിനെ തുടര്‍ന്നാണ് ഇതുസംബന്ധിച്ച് തമിഴ്‌നാടുമായി ധാരണയിലെത്തിയത്.

 

അതിഥി തൊഴിലാളികള്‍ക്ക് ഭക്ഷണക്കിറ്റിനൊപ്പമാണ് ഇനി പാലും തൈരും നല്‍കുക. ഓരോ ജില്ലയിലും ഇത്തരത്തില്‍ എത്ര പേര്‍ക്കു നല്‍കണമെന്നതു സംബന്ധിച്ച് ചുമതലയുള്ള നോഡല്‍ ഓഫിസര്‍മാരില്‍ നിന്ന് വിശദാംശങ്ങള്‍ തേടിയിട്ടുണ്ട്. മില്‍മ മേഖലാ ഭരണസമിതികള്‍ക്കും ഇതുസംബന്ധിച്ച് നിര്‍ദേശം നല്‍കി.

 

അങ്കണവാടികള്‍ അടഞ്ഞുകിടക്കുന്ന സാഹചര്യത്തില്‍ കുട്ടികളുടെ വീടുകളില്‍ പാല്‍ എത്തിച്ചുകൊടുക്കാനാണ് സര്‍ക്കാര്‍ ആലോചിക്കുന്നത്. ഇതു സംബന്ധിച്ച് ബന്ധപ്പെട്ട വകുപ്പില്‍ നിന്ന് മന്ത്രി അടിയന്തര റിപ്പോര്‍ട്ട് തേടിയിട്ടുണ്ട്. കൂടാതെ, വെല്ലൂര്‍ ഡിണ്ടിഗല്‍ പ്ലാന്റുകളിലും കേരളത്തിലെ പാല്‍ എത്തിച്ച് പൊടിയാക്കി മാറ്റാന്‍ ശ്രമങ്ങള്‍ നടക്കുകയാണ്. ഇതോടെ കുറച്ചുദിവസമായി മലബാര്‍ മേഖലയില്‍ പാല്‍ സംഭരണത്തിലുണ്ടായ വന്‍ പ്രതിസന്ധിക്കാണ് പരിഹാരമാകുന്നത്. ലോക്ക് ഡൗണ്‍ നിലവില്‍ വന്നതോടെ മില്‍മ സംഭരിക്കുന്ന പാല്‍ പകുതി മാത്രമാണ് വില്‍ക്കാന്‍ കഴിഞ്ഞിരുന്നത്. ബാക്കി വരുന്ന പാല്‍ പാഴാവുന്ന അവസ്ഥ വന്നതോടെ മലബാറില്‍ പാല്‍ സംഭരണത്തില്‍ മില്‍മ നിയന്ത്രണമേര്‍പ്പെടുത്തിയതാണ് ക്ഷീരകര്‍ഷകര്‍ക്കു വിനയായത്. 

 

ബാക്കി വരുന്ന പാല്‍ ചെലവാക്കാന്‍ സര്‍ക്കാര്‍ പുതിയ മാര്‍ഗങ്ങള്‍ കണ്ടെത്തുകയും പ്രതിദിനം 50,000 ലിറ്റര്‍ പൊടിയാക്കി മാറ്റാന്‍ തമിഴ്‌നാട് തയാറാവുകയും ചെയ്ത സാഹചര്യത്തില്‍ കര്‍ഷകരില്‍ നിന്ന് പാല്‍ സ്വീകരിക്കുന്നതു സംബന്ധിച്ച് മില്‍മ സ്വീകരിച്ച നിയന്ത്രണങ്ങള്‍ എടുത്തുകളയുന്നതായും ഇന്നു മുതല്‍ കര്‍ഷകരില്‍ നിന്ന് മുഴുവന്‍ പാലും സ്വീകരിക്കുമെന്നും മില്‍മ മലബാര്‍ മേഖലാ ചെയര്‍മാന്‍ കെ.എസ് മണിയും മാനേജിങ് ഡയരക്ടര്‍ കെ.എം വിജയകുമാറും അറിയിച്ചു.