റിയാദ്: സഊദി വനിതകള്‍ക്ക് ചരിത്ര നിമിഷം. ചരിത്രത്തില്‍ ആദ്യമായി ട്രാഫിക് വിഭാഗം വനിതക്ക് ഡ്രൈവിങ് ലൈസന്‍സ് നല്‍കി. ഈ മാസം അവസാനത്തോടെ വനിതകള്‍ക്ക് നിരത്തുകളില്‍ വാഹനമോടിക്കാന്‍ നല്‍കുന്ന നിയമം പ്രാബല്യത്തില്‍ വരുന്നതിന്റെ മുന്നോടിയയാണ് വനിതകള്‍ക്ക് ലൈസന്‍സ് നല്‍കി തുടങ്ങിയത്.

സഊദി ഭരണ ചരിത്രത്തിലെ ഏറ്റവും  പ്രാധാന്യത്തോടെ റിപ്പോര്‍ട്ട് ചെയ്യപ്പെട്ട നിമിഷമായിരുന്നു വനിതകള്‍ക്ക് ഡ്രൈവിങ്ങിനു അനുമതി നല്‍കിയ സഊദി ഭരണാധികാരി സല്‍മാന്‍ ബിന്‍ അബ്ദുല്‍ അസീസ് രാജാവിന്റെ പ്രഖ്യാപനം.

ആദ്യ വനിതാ ഡ്രൈവിങ് ലൈസന്‍സ് നല്‍കിയ വാര്‍ത്ത വന്‍ പ്രാധ്യാന്യത്തോടെയാണ് സഊദി മാധ്യമങ്ങളും സോഷ്യല്‍ മീഡിയയും ആഘോഷിക്കുന്നത്. ഈമാസം 24 നാണു സ്ത്രീകള്‍ വാഹനങ്ങളുമായി നിരത്തിലിറങ്ങുന്നത്. അതിനുള്ള എല്ലാ ഒരുക്കങ്ങളും പൂര്‍ത്തിയായതായി ട്രാഫിക് ജനറല്‍ ഡിപ്പാര്‍ട്ടമെന്റ് ഡയറക്റ്റര്‍ ജനറല്‍ മുഹമ്മദ് അല്‍ ബസാമി പറഞ്ഞു.

കഴിഞ്ഞ വര്‍ഷം സെപ്തംബറിലാണ് വനിതകള്‍ക്ക് വാഹനമോടിക്കാനുള്ള അനുമതി നല്‍കി രാജവിജ്ഞാപനം പുറത്തു വന്നത്. തുടര്‍ന്ന് വനിതകള്‍ക്ക് ഡ്രൈവിങ് സ്‌കൂളുകള്‍ തുറക്കുകയും പരിശീലകരെ നിയമിക്കുകയും ചെയ്തിരുന്നു.

പരിശീലനം നല്‍കാനായി യു എസ്, കാനഡ എന്നിവിടങ്ങളില്‍ നിന്നും പരിശീലകരും എത്തിയിരുന്നു. പതിനെട്ടു വയസ്സ് പൂര്‍ത്തിയായ വനിതകള്‍ക്ക് ഡ്രൈവിങ് ലൈസന്‍സിന് അപേക്ഷിക്കാന്‍ അര്‍ഹതയുണ്ടെന്ന് അല്‍ ബസാമി വ്യക്തമാക്കി.

വിദേശ ഡ്രൈവിങ് ലൈസന്‍സ് കൈവശമുള്ള വനിതകള്‍ക്ക് പ്രത്യേക പ്രോസസിലൂടെ സഊദി വനിതാ ഡ്രൈവിങ് ലൈസന്‍സ് കരസ്ഥമാക്കാനുള്ള നടപടികളും നടന്നു വരികയാണ്. സഊദി കിരീടാവകാശിയും പ്രതിരോധ മന്ത്രിയുമായ മുഹമ്മദ് ബിന്‍ സല്‍മാന്റെ പ്രത്യേക താത്പര്യപ്രകാരമാണ് വനിതാ ഡ്രൈവിങ്ങിനു അനുമതി നല്‍കിയത്. വനിതകള്‍ വാഹനമോടിച്ചു രംഗത്തിറങ്ങുന്നതോടെ മലയാളികളടക്കം ലക്ഷക്കണക്കിന് വിദേശ ഹൗസ് ഡ്രൈവര്‍മാരുടെ ഭാവി എന്താകുമെന്ന ആശങ്കയും നിലനില്‍ക്കുന്നുണ്ട്.

[video width="180" height="320" mp4="http://suprabhaatham.com/wp-content/uploads/2018/06/driving.mp4"][/video]