ജിദ്ദ: സഊദിയിലെ ദമ്മാമില്‍ മലയാളി കുത്തേറ്റ് മരിച്ചു സംഭവത്തിൽ കൊല്ലം സ്വദേശി പിടിയിൽ. തിരുവനന്തപുരം വിഴിഞ്ഞം സ്വദേശി സന്തോഷ് പീറ്ററാണ് (32) ഇന്നലെ വൈകിട്ട് അല്‍ കോബാര്‍ റാക്കയിലുള്ള താമസസ്ഥലത്തു കുത്തേറ്റ് മരിച്ച കേസിൽ പ്രതി കൊല്ലം സ്വദേശി സക്കീര്‍ ആണ് പിടിയിലായത്.

സ്വകാര്യ മാന്‍പവര്‍ കമ്പനിയുടെ കീഴില്‍ കഴിഞ്ഞ ആറു മാസമായി ഹൗസ് ഡ്രൈവര്‍ ആയി ജോലി ചെയ്തുവരികയായിരുന്നു. ഇതേ സ്ഥാപനത്തിലെ തന്നെ ഹൗസ് ഡ്രൈവറും മലയാളിയുമായ കൊല്ലം സ്വദേശിയുടെ കുത്തേറ്റാണ് സന്തോഷ് മരിച്ചത്. 

വൈകിട്ട് ഏഴിന് ജോലി കഴിഞ്ഞതിനു ശേഷം താമസ സ്ഥലത്തു എത്തിയ പീറ്ററും സുഹൃത്തുക്കളും ഒന്നിച്ച് മദ്യപിക്കുന്നതിനിടെയുണ്ടായ തർക്കമാണ് കൊലപാതകത്തിൽ കലാശിച്ചത്. വാക്കേറ്റത്തിനിടെ കൊല്ലം സ്വദേശി സക്കീർ കത്തിയെടുത്തു കുത്തുകയായിരുന്നു. സന്തോഷ് തൽക്ഷണം മരിച്ചു. കൂടെയുണ്ടായിരുന്ന കോട്ടയം മണിമല സ്വദേശി ജൂജിൻ വർഗീസിനും പരിക്കേറ്റു. ഇദ്ദേഹത്തെ അടുത്തുള്ള ആശുപത്രിയിൽ എത്തിച്ചതോടെ അപകടനില തരണം ചെയ്തു. പ്രതിയെ വൈകിട്ട് കോർണിഷിൽ വെച്ച് പോലീസ് പിടികൂടി. മൊബൈൽ ഫോൺ പിന്തുടർന്നാണ് ഇയാളെ പിടികൂടിയത്.

മരിച്ച സന്തോഷിന്റെ മൃതദ്ദേഹം ദമ്മാം ജനറല്‍ ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്.