കൊണ്ടോട്ടി: ഗള്‍ഫില്‍ നിന്നെത്തിയ മൂന്ന് യാത്രക്കാരില്‍ നിന്നായി 648.75 ഗ്രാം സ്വര്‍ണം കരിപ്പൂര്‍ എയര്‍ കസ്റ്റംസ് ഇന്റലിജന്‍സ് പിടികൂടി. ദുബൈ,ദോഹ എന്നിവിടങ്ങളില്‍ നിന്നായി എത്തിയ യാത്രക്കാരില്‍ നിന്നാണ് സ്വര്‍ണം കണ്ടെടുത്തത്.
ജെറ്റ് എയര്‍വേയ്‌സ് വിമാനത്തിലെത്തിയ മഞ്ചേരി സ്വദേശി സഫീര്‍(23) ശരീരത്തില്‍ ഒളിപ്പിച്ച 350.75 ഗ്രാം സ്വര്‍ണമാണ് കണ്ടെടുത്തത്. അടിവസ്ത്രത്തില്‍ ഒളിപ്പിച്ച 700 ഗ്രാം രാസ സംയുക്തത്തില്‍ നിന്ന് സ്വര്‍ണം വേര്‍തിരിച്ചെടുക്കുകയായിരുന്നു. വിപണിയില്‍ 11,04,161 രൂപ വിലവരും. ജെറ്റ് എയര്‍വേയ്‌സിലെത്തിയ മലപ്പുറം സ്വദേശി റഷീദ് (33) അടിവസ്ത്രത്തില്‍ ഒളിപ്പിച്ചുകടത്താന്‍ ശ്രമിച്ച 149 ഗ്രാം സ്വര്‍ണ മാലകളാണ് കണ്ടെടുത്തത്. ഇതിന് 4,69,052 രൂപ വിലവരും. എയര്‍ ഇന്ത്യ എക്‌സ്പ്രസിന്റെ ദുബൈ വിമാനത്തിലെത്തിയ കോഴിക്കോട് സ്വദേശി സഫീര്‍(28) ശരീരത്തില്‍ ഒളിപ്പിച്ചു കടത്തിയ 149 ഗ്രാം സ്വര്‍ണ മാലകളും കസ്റ്റംസ് കണ്ടെടുത്തു. ഇതിന് 4,69,052 രൂപ വിലവരും. മൂന്നു പേരില്‍ നിന്നായി 20,42,265 രൂപ വിലവരുന്ന 648.75 ഗ്രാം സ്വര്‍ണമാണ് കണ്ടെടുത്തത്.
കരിപ്പൂര്‍ വിമാനത്താവളത്തില്‍ കഴിഞ്ഞ മാസം എയര്‍ കസ്റ്റംസ് ഇന്റലിജന്‍സ് വിഭാഗം പിടിച്ചെടുത്തത് 21.6 കിലോ സ്വര്‍ണമാണ്. ആഭരണങ്ങളായും മിശ്രിത രൂപത്തിലും എത്തിച്ചതാണ് ഇവയില്‍ ഭൂരിഭാഗവും.