തിരുവനന്തപുരം: പരിസ്ഥിതി ആഘാത പഠനറിപ്പോര്‍ട്ടു ലഭിച്ചതിനുശേഷം ശബരിമല വിമാനത്താവള നിര്‍മാണത്തിനുള്ള തുടര്‍നടപടി സ്വീകരിക്കുന്നതാണെന്ന് മുഖ്യമന്ത്രി പിണറായി വിജയന്‍ നിയമസഭയില്‍ പറഞ്ഞു. ശബരിമലയില്‍ ഒരു ഗ്രീന്‍ ഫീല്‍ഡ് എയര്‍പോര്‍ട്ട് ആരംഭിക്കുന്നതിനുള്ള സാധ്യതാ പഠനം ലൂയിസ് ബര്‍ഗര്‍ എന്ന കണ്‍സള്‍ട്ടിങ് കമ്പനി നടത്തിവരികയാണ്.
പദ്ധതിക്കാവശ്യമായ അംഗീകാരം, അനുമതി എന്നിവ ഒന്‍പത് മാസത്തിനകം ലഭ്യമാക്കണമെന്ന വ്യവസ്ഥയിലാണ് പ്രസ്തുത സ്ഥാപനം കെ.എസ്.ഐ.ഡി.സിയുമായി ധാരണാ പത്രം ഒപ്പുവച്ചിട്ടുള്ളത്. റിപ്പോര്‍ട്ട് ലഭ്യമാക്കുന്ന മുറയ്ക്ക് ഇക്കാര്യത്തില്‍ തുടര്‍ നടപടികള്‍ സ്വീകരിക്കുന്നതാണെന്നും രാജു എബ്രഹാമിന്റെ സബ്മിഷന് മുഖ്യമന്ത്രി മറുപടി പറഞ്ഞു.