ആലപ്പുഴ: യൂത്ത് കോൺഗ്രസ്‌ സംസ്ഥാന ക്യാമ്പിൽ അവതരിപ്പിച്ച പ്രമേയത്തിൽ കോൺഗ്രസ് നേതാക്കൾക്കെതിരെ വിമർശനം. നിലമ്പൂർ തെരഞ്ഞെടുപ്പ് വിജയത്തിന് പിന്നാലെ ഉയർന്ന 'ക്യാപ്റ്റൻ', 'മേജർ' വിളികൾക്കെതിരെയാണ് പ്രമേയത്തിൽ പരാമർശം ഉള്ളത്. ക്യാപ്റ്റനും മേജറുമൊക്കെ സൈന്യത്തിലാണെന്നും ഇത്തരം വിളികൾ നാണക്കേടെന്നും നേതാക്കൾ അപഹാസ്യരാകരുതെന്നും പ്രമേയ ചർച്ചയിൽ പ്രതിനിധികൾ അഭിപ്രായപ്പെട്ടു.  

ജനത്തിന് അവമതിപ്പുണ്ടാകുന്ന ഇടപെടലുകൾ എല്ലവരും ഒഴിവാക്കണമെന്നും യൂത്ത് കോൺഗ്രസ് പ്രതിനിധികൾ ആവശ്യപ്പെട്ടു. ഇത്തരം വിളികൾ പ്രോത്സാഹിപ്പിക്കുന്നത് നേതാക്കൾ തന്നെയെന്നും വിമർശനമുയർന്നു. സംഘടന ഭാരവാഹികൾ, ജനപ്രതിനിധികൾ ആയാൽ സംഘടന സ്ഥാനം ഒഴിയണമെന്നും ജനപ്രതിനിധികൾക്ക് തിരക്ക് കാരണം സംഘടന ശ്രദ്ധിക്കാനാകുന്നില്ലെന്നും പ്രമേയത്തിൽ വിമർശനമുയർന്നു. 

ALSO READ: ഹിന്ദി അടിച്ചേൽപ്പിക്കാൻ ശ്രമം; പ്രതിഷേധം ആളിക്കത്തി, ഉത്തരവുകൾ പിൻവലിച്ച് മഹാരാഷ്ട്ര സർക്കാർ

നിലമ്പൂർ ഉപതെരഞ്ഞെടുപ്പിൽ യുഡിഎഫ് മികച്ച വിജയം നേടിയതിന് പിന്നാലെയാണ് പ്രതിപക്ഷ നേതാവ് വി.ഡി സതീശനെ ക്യാപ്റ്റനെന്ന് വിളിച്ചത്. പിന്നാലെ താൻ പ്രതിപക്ഷ നേതാവ് ആയിരുന്നപ്പോഴും പല ഉപതെരഞ്ഞെടുപ്പും വിജയിച്ചിട്ടുണ്ടെങ്കിലും, അന്ന് എന്നെയാരും ക്യാപ്റ്റനാക്കിയിട്ടില്ലെന്ന് രമേശ് ചെന്നിത്തല പ്രതികരിച്ചിരുന്നു. ഇക്കാര്യം മാധ്യമ പ്രവർത്തകർ പറഞ്ഞപ്പോൾ, 'എന്നെ ക്യാപ്റ്റൻ എന്നു വിളിച്ചിട്ടുണ്ടെങ്കിൽ, രമേശ് ചെന്നിത്തല ക്യാപ്റ്റനല്ല മേജർ ആണെന്ന്' വി.ഡി സതീശൻ മറുപടി നൽകിയിരുന്നു. ഇതിന് പിന്നാലെയാണ് ഈ വിളികൾ കൂടുതൽ കേൾക്കാൻ തുടങ്ങിയത്. പിന്നാലെ സോൾജിയർ വിളികളുമായി ചില നേതാക്കളും രംഗത്ത് വന്നു.

അതേസമയം, യൂത്ത്കോൺഗ്രസിൽ പ്രായപരിധി വർധിപ്പിക്കുന്നതിനെതിരെ യൂത്ത് കോൺഗ്രസ്‌ സംസ്ഥാന ക്യാംപിൽ 13 ജില്ലാകമ്മിറ്റികൾ എതിർപ്പറിയിച്ചു. തദ്ദേശ തെരഞ്ഞെടുപ്പിൽ യുവാക്കൾക്ക്‌ 50 ശതമാനം സീറ്റ് വേണമെന്നും ക്യാമ്പിൽ ആവശ്യമുയർന്നു. പുതുതലമുറയെ ആകർഷിക്കുന്ന ശൈലി വേണമെന്നുംആവശ്യമുയർന്നു.