മലപ്പുറം: പ്ലസ്‌വണ്‍ പ്രവേശനത്തിന്റെ ട്രയല്‍ അലോട്ട്‌മെന്റ് ലിസ്റ്റില്‍ ജില്ലയില്‍നിന്ന് ഇടംപിടിച്ചത് 32,244 പേര്‍. ജില്ലയില്‍ ആകെയുള്ള 40,154 മെറിറ്റ് സീറ്റുകളില്‍ ഒഴിച്ചിട്ടത് 7,910 സീറ്റുകള്‍ മാത്രം. 2018-19 വര്‍ഷ ഹയര്‍സെക്കന്‍ഡറി പ്രവേശനത്തിനു ജില്ലയില്‍നിന്ന് 81,616 വിദ്യാര്‍ഥികളാണ് അപേക്ഷ നല്‍കിയിരുന്നത്.
ഇതില്‍ 49,372 പേരാണ് ലിസ്റ്റില്‍ ഇടംപിടിക്കാതെ പോയത്. ജനറല്‍ വിഭാഗത്തില്‍ 21,510 സീറ്റുകളുള്ള ജില്ലയില്‍ മുഴുവന്‍ സീറ്റുകളിലും അലോട്ട്‌മെന്റ് നടന്നു. സംവരണ വിഭാഗങ്ങളായ മുസ്‌ലിം, ഈഴവ, തിയ്യ, ബില്ലവ, വിശ്വകര്‍മ വിഭാഗങ്ങളിലെ മുഴുവന്‍ സീറ്റുകളും ട്രയല്‍ അലോട്ട്‌മെന്റില്‍ ഉള്‍പ്പെടുത്തിയിട്ടുണ്ട്. മുസ്‌ലിം സംവരണം 1,754, ഈഴവ, തിയ്യ, ബില്ലവ 2,161, വിശ്വകര്‍മ 449 എന്നിങ്ങനെയാണ് സീറ്റുനില.
ട്രയല്‍ അലോട്ട്‌മെന്റ് വിവരങ്ങള്‍ പരിശോധിച്ച് ആവശ്യമായ തിരുത്തല്‍ വരുത്തുന്നതിനുള്ള സമയം ഇന്നു വൈകിട്ട് നാലുവരെയാണ്. ട്രയല്‍ അലോട്ട്‌മെന്റ് വിവരങ്ങള്‍ മുഴുവന്‍ അപേക്ഷകരും പരിശോധിക്കണമെന്ന് ഹയര്‍സെക്കന്‍ഡറി ഡയരക്ടറേറ്റ് നിര്‍ദേശിച്ചിട്ടുണ്ട്. 12നാണ് ആദ്യ അലോട്ട്‌മെന്റ്.