മഞ്ചേരി: പിതാവിനെ കത്തി കൊണ്ട് കുത്തിക്കൊലപ്പെടുത്തിയ കേസില്‍ പ്രതിയായ മകന് മഞ്ചേരി അഡീഷണല്‍ ജില്ലാ സെഷന്‍സ് കോടതി(രണ്ട്) ജഡ്ജി പി.എസ് ശശികുമാര്‍ ജീവപര്യന്തം തടവും 10,000 രൂപ പിഴയും ശിക്ഷ വിധിച്ചു. പിഴയടക്കാത്ത പക്ഷം രണ്ടു വര്‍ഷത്തെ അധിക കഠിന തടവ് അനുഭവിക്കണം. പിഴയടച്ചാല്‍ തുക കൊല്ലപ്പെട്ട മുഹമ്മദ് ബാവയുടെ ആശ്രിതര്‍ക്ക് നല്‍കണം. തിരൂര്‍ വൈലത്തൂര്‍ നഴ്‌സറിപ്പടിയില്‍ അടിമപ്പറമ്പില്‍ മുഹമ്മദ് ബാവയുടെ മകന്‍ റിയാസ് (30) ആണ് പ്രതി. 2013 നവംബര്‍ 11 നാണ് കേസിന്നാസ്പദമായ സംഭവം. 36 വര്‍ഷം വിദേശത്ത് ജോലി ചെയ്ത് തിരിച്ചെത്തിയതായിരുന്നു കൊല്ലപ്പെട്ട മുഹമ്മദ് ബാവ (60). മകന്‍ റിയാസ് അസമയത്ത് ടി.വി കണ്ടത് തടഞ്ഞ മുഹമ്മദ് ബാവ മകനെ അടിച്ചിരുന്നു. ഇതിലുള്ള വിരോധമാണ് കൊലപാതകത്തിന് കാരണം. പുലര്‍ച്ചെ രണ്ട് മണിക്ക് വീട്ടിലെ ഡൈനിംഗ് ഹാളില്‍ വച്ചാണ് മുഹമ്മദ് ബാവയെ മകന്‍ റിയാസ് കത്തി കൊണ്ട് കുത്തി കൊലപ്പെടുത്തിയത്. കല്‍പ്പകഞ്ചേരി പൊലീസാണ് കേസന്വേഷിച്ച് കുറ്റപത്രം സമര്‍പ്പിച്ചത്. 30 സാക്ഷികളെ അഡീഷണല്‍ പബ്ലിക് പ്രോസിക്യൂട്ടര്‍മാരായ അബ്ദുറഹ്മാന്‍ കാരാട്ടും പി.പി ബാലകൃഷ്ണനും കോടതി മുമ്പാകെ വിസ്തരിച്ചു.