അഹമ്മദാബാദ്: ഗുജറാത്തില്‍ 14 മാസം പ്രായമായ കുഞ്ഞ് കൊവിഡ് 19 വൈറസ് ബാധയെ തുടര്‍ന്ന് മരിച്ചു. ജമുനാനഗര്‍ സര്‍ക്കാര്‍ ആശുപത്രിയില്‍ ചികിത്സയിലിരുന്ന ആണ്‍കുട്ടിയാണ് മരിച്ചത്. കുട്ടിയ്ക്ക് എങ്ങനെയാണ് രോഗം പിടിപെട്ടതെന്ന് വ്യക്തമല്ല.

ഏപ്രില്‍ അഞ്ചിനാണ് കുട്ടിയെ ആശുപത്രിയില്‍ പ്രവേശിപ്പിച്ചത്. ആശുപത്രിയില്‍ എത്തുമ്പോള്‍ തന്നെ കുട്ടി അതീവഗുരുതരാവസ്ഥയിലായിരുന്നു. വെന്റിലേറ്ററില്‍ കഴിയുകയായിരുന്ന കുട്ടിയുടെ അവയവങ്ങളുടെ പ്രവര്‍ത്തനം നിലച്ചതോടെയാണ് മരണം സംഭവിച്ചതെന്നാണ് റിപ്പോര്‍ട്ട്.

ഉത്തര്‍പ്രദേശില്‍ നിന്നുള്ള കുടിയേറ്റ തൊഴിലാളികളാണ് കുട്ടിയുടെ മാതാപിതാക്കള്‍.
ഇരുവരും ഇതുവരെ രോഗലക്ഷണമൊന്നും കാണിച്ചിട്ടില്ല. ഇവര്‍ ക്വാറന്റൈനില്‍ തുടരുകയാണ്. ഇവര്‍ എവിടേയും യാത്ര പോയിട്ടില്ലെന്നും ആരോഗ്യ പ്രവര്‍ത്തകര്‍ പറയുന്നു. കുട്ടിക്ക് രോഗം പകര്‍ന്നത് എവിടെനിന്നെന്ന് കണ്ടെത്താനുള്ള തീവ്രശ്രമത്തിലാണ് ആരോഗ്യ പ്രവര്‍ത്തകര്‍.

ഗുജറാത്തില്‍ കൊവിഡ് 19 ല്‍ മരിക്കുന്ന ഏറ്റവും പ്രായം
കുറഞ്ഞ രോഗിയാണ് ഈ കുഞ്ഞ്. ഇവരുടെ ഗ്രാമം മുഴുവന്‍ പൂര്‍ണ ലോക്കഡൗണ്‍ പ്രഖ്യാപിച്ചിരിക്കുകയാണ്.

175 കേസുകളാണ് ഗുജറാത്തില്‍ സ്ഥിരീകരിച്ചിട്ടുളളത്. 16 മരണവും റിപ്പോര്‍ട്ട് ചെയ്തിട്ടുണ്ട്.