എടക്കര: മുണ്ട ഗവ.ആശുപത്രി പരിസരങ്ങളില്‍ മോഷണവും വീടുകളില്‍ ഒളിഞ്ഞ് നോട്ടവും പതിവാക്കിയ മുണ്ട സ്വദേശിയായ യുവാവ് പൊലിസ് പിടിയിലായി. പറമ്പില്‍ ജനീഷ് (33)നെ പൊലിസ് പിടിയിലായത്. മുണ്ട പ്രദേശത്ത് കഴിഞ്ഞ മൂന്നു മാസത്തോളമായി സാമൂഹ്യ വിരുദ്ധരുടെ ശല്യം രൂക്ഷമായിരുന്നു. കഴിഞ്ഞ ദിവസം അശുപത്രിയോട് ചേര്‍ന്ന വീട്ടില്‍ നിന്ന് മൊബൈല്‍ ഫോണും പതിനായിരം രൂപയും മോഷണം പോയിരുന്നു. വീട്ടുകാര്‍ വഴിക്കടവ് സ്‌റ്റേഷനില്‍ പരാതി നല്‍കിയിരുന്നു. എടക്കര സി.ഐ പി.കെ സന്തോഷിന്റെ നേതൃത്വത്തിലുള്ള സംഘം രാത്രികാലങ്ങളില്‍ പട്രോളിങ് ശക്തമാക്കിയിരുന്നു. സാമൂഹ്യ വിരുദ്ധരെ കേന്ദ്രീകരിച്ച് നടത്തിയ അന്വേഷണത്തില്‍ ആണ് പ്രതിയെ കുറിച്ച് വിവരം കിട്ടിയത്. മോഷണം നടത്തിയ മൊബൈല്‍ ഫോണ്‍ സിം കാര്‍ഡ് എന്നിവ പ്രതിയുടെ വീട്ടില്‍ നിന്നും കണ്ടെടുത്തു. പ്രതി ഉള്‍പ്പെട്ട സംഘത്തെ നാളുകള്‍ക്ക് മുമ്പ് കോഴി മോഷണ കേസില്‍ നാട്ടുകാര്‍ പിടികൂടിയിരുന്നു. എടക്കര സി.ഐ പി.കെ സന്തോഷ്, എ.എസ്.ഐമാരായ അസൈനാര്‍, കെ.ജയകൃഷ്ണന്‍, സി.പി.ഒ മാരായ എന്‍.പി സുനില്‍, സലീല്‍ ബാബു എന്നിവരും സംഘത്തിലുണ്ടായിരുന്നു.