കൊച്ചി: സർക്കാർ ആശുപത്രികളിലും മെഡിക്കൽ കോളജുകളിലും മരുന്നു ക്ഷാമം അതീവ രൂക്ഷമെന്ന് പ്രതിപക്ഷ നേതാവ് വി.ഡി. സതീശൻ. ആരോഗ്യമന്ത്രിയുടെ വാഗ്ദാനങ്ങൾ പാഴായെന്നും, ശസ്ത്രക്രിയയ്ക്ക് ശേഷം തുന്നാനുള്ള നൂൽ പോലും രോഗികൾ വാങ്ങേണ്ട അവസ്ഥയാണെന്നും അദ്ദേഹം വിമർശിച്ചു. ഒരു രോഗിയുടെ ചികിത്സയ്ക്കായി 88,000 രൂപ ചെലവഴിക്കേണ്ടി വന്നതായും, സ്വകാര്യ ആശുപത്രികളെ അപേക്ഷിച്ച് സർക്കാർ ആശുപത്രികളിൽ സാധനങ്ങൾ വാങ്ങാൻ വേഗത കുറവാണെന്ന മന്ത്രിയുടെ പ്രസ്താവന അപഹാസ്യമാണെന്നും സതീശൻ കുറ്റപ്പെടുത്തി.

ആരോഗ്യമേഖലയിലെ തകർച്ച പഠിക്കാൻ പൊതുജനാരോഗ്യ വിദഗ്ധരെ ഉൾപ്പെടുത്തി യു.ഡി.എഫ് ആരോഗ്യ കമ്മിഷൻ പ്രഖ്യാപിച്ചു. ഇതിന്റെ ഭാഗമായി ഹെൽത്ത് കോൺക്ലേവ് സംഘടിപ്പിക്കുമെന്നും അദ്ദേഹം അറിയിച്ചു. ആശുപത്രികൾ ഒരു വർഷത്തേക്ക് ആവശ്യമായ സാധനങ്ങൾക്ക് ഇൻഡന്റ് നൽകിയിട്ടും ടെൻഡർ വിളിക്കാത്തതും പ്ലാൻ ഫണ്ട് വെട്ടിക്കുറച്ചതും പ്രതിസന്ധി രൂക്ഷമാക്കിയെന്ന് സതീശൻ ആരോപിച്ചു. “സംസ്ഥാനത്ത് ധനപ്രതിസന്ധിയില്ലെന്ന് മുഖ്യമന്ത്രി പറയുമ്പോൾ, ആരോഗ്യ കേരളം വെന്റിലേറ്ററിലാണ്,” അദ്ദേഹം കൂട്ടിച്ചേർത്തു.

സ്വകാര്യ ലാബുകളിലേക്ക് രോഗികളെ പറഞ്ഞയക്കുന്നു

സർക്കാർ മെഡിക്കൽ കോളജുകളിൽ മരുന്നുകൾ, ലാബ് ടെസ്റ്റുകൾ, ഉപകരണങ്ങൾ എന്നിവക്കായി രോഗികളെ സ്വകാര്യ സ്ഥാപനങ്ങളിലേക്ക് പറഞ്ഞയക്കുന്ന ഗൂഢസംഘം പ്രവർത്തിക്കുന്നുവെന്ന പരാതിയിൽ നടപടി സ്വീകരിക്കാൻ മുഖ്യമന്ത്രിയുടെ ഓഫിസ് നിർദേശം നൽകി. ഹൈക്കോടതി അഭിഭാഷകനും പൊതുപ്രവർത്തകനുമായ കുളത്തൂർ ജയ്സിങ് നൽകിയ പരാതിയെ തുടർന്നാണ് മെഡിക്കൽ വിദ്യാഭ്യാസ വകുപ്പ് ഡയറക്ടർക്ക് നിർദേശം ലഭിച്ചത്.

സർക്കാർ മെഡിക്കൽ കോളജുകളിൽ ലഭ്യമായ മരുന്നുകൾ എഴുതാതെ, സ്വകാര്യ മെഡിക്കൽ ഷോപ്പുകളിൽ നിന്ന് മരുന്ന് വാങ്ങാൻ രോഗികളെ പ്രേരിപ്പിക്കുന്നതായി പരാതിയിൽ ആരോപിക്കുന്നു. രോഗികളുടെ എണ്ണം വർധിക്കുമ്പോൾ മരുന്നിന്റെയും ഉപകരണങ്ങളുടെയും ലഭ്യത ഉറപ്പാക്കുന്നതിൽ മനപൂർവമായ കൃത്യവിലോപം കാണിക്കുന്നുവെന്നും, ഇതുമൂലം രോഗികൾ സ്വകാര്യ ലാബുകളെയും മെഡിക്കൽ ഷോപ്പുകളെയും ആശ്രയിക്കേണ്ടി വരുന്നുവെന്നും പരാതി ചൂണ്ടിക്കാട്ടുന്നു.

Opposition Leader V.D. Satheesan has criticized the severe medicine shortage in Kerala's government hospitals and medical colleges, alleging systemic failures. Patients are forced to buy essentials, including surgical threads, and rely on private labs due to deliberate lapses. The UDF has announced a health commission to address the crisis, while the Chief Minister’s office has directed action against a nexus diverting patients to private facilities.