തിരുവനന്തപുരം: കൊവിഡ് ബാധിതന്‍ മരിച്ചതിനെത്തുടര്‍ന്ന് കടുത്ത നിയന്ത്രണങ്ങള്‍ ഏര്‍പ്പെടുത്തിയ പോത്തന്‍കോട് ആശങ്കകള്‍ മാറിത്തുടങ്ങിയെന്ന് മന്ത്രി കടകംപള്ളി സുരേന്ദ്രന്‍. പോത്തന്‍കോട് സ്വദേശി അബ്ദുള്‍ അസീസ് കൊവിഡ് ബാധിച്ച് മരിച്ചതിനെത്തുടര്‍ന്ന് കടുത്ത നിയന്ത്രണങ്ങളാണ് പ്രദേശത്ത് ഏര്‍പ്പെടുത്തിയിരുന്നത്.

എങ്ങനെയാണ് ഇദ്ദേഹത്തിന് രോഗം ബാധിച്ചതെന്ന് തിരിച്ചറിയാനാവാതിരുന്നത് ആശങ്ക സൃഷ്ടിച്ചിരുന്നു. എന്നാല്‍ പ്രദേശത്ത് പരിശോധനയ്ക്ക് അയച്ച മുഴുവന്‍ സാമ്പിളുകളും നെഗറ്റീവായിരുന്നുവെന്ന് മന്ത്രി അറിയിച്ചു.

നിലവില്‍ നാലു പേരാണ് രോഗം ബാധിച്ച് ചികിത്സയില്‍ കഴിയുന്നത്. നിലവില്‍ ആശങ്കപ്പെടേണ്ട സാഹചര്യമില്ലെന്നും അദ്ദേഹം പറഞ്ഞു.