ചാവക്കാട്: യാത്രക്കിടയില് വഴി തെറ്റി ബ്ലാങ്ങാട്ടെത്തിയ പട്ടാളലോറികള്‍ നാട്ടുകാരില്‍ പരിഭ്രാന്തി പരത്തി. ദേശീയപാതയില്‍ ചാവക്കാട് മുല്ലത്തറ ജംഗ്ഷനില്‍ നിന്ന് ഇടത്തോട്ട് തിരിഞ്ഞ് ചാവക്കാട് നഗരം വഴി പോകുന്നതിനു പകരം മുപ്പതോളം വരുന്ന പട്ടാള വണ്ടികള്‍ വഴിതെറ്റി നേരേപോയത് ബ്ലാങ്ങാട് ഭാഗത്തേക്ക്.

ഞായറാഴ്ച വൈകീട്ട് നാലോടെയാണ് സംഭവം. കുറേ ദൂരം ചെന്നപ്പോള്‍ വണ്ടി തിരിക്കാനാവാത്ത വിധം റോഡ് ഇടുങ്ങിയപ്പോഴാണ് വഴിതെറ്റിയെന്ന് പട്ടാളക്കാര്‍ക്ക് മനസ്സിലായത്. പട്ടാളക്കാരില്‍ കുറച്ചു പേര്‍ക്ക് എറണാകുളത്തേക്കും മറ്റുള്ളവര്‍ക്ക് കണ്ണൂരിലേക്കുമാണ് പോകേണ്ടിയിരുന്നത്. വഴി ചോദിക്കാന്‍ പട്ടാളക്കാര്‍ റോഡിലിറങ്ങിയതാണ് നാട്ടുകാരെ ആശങ്കയിലാഴ്ത്തിയത്. ഹിന്ദി അറിയാവുന്ന ഒരു നാട്ടുകാരനോട് വഴി ചോദിച്ച് വൈകാതെ തന്നെ പട്ടാള വണ്ടികള്‍ ബ്ലാങ്ങാട് നിന്നും മടങ്ങി.

അതിനിടയില്‍ ബ്ലാങ്ങാട് കലാപം നടക്കാന്‍ പോകുന്നുവെന്ന ഐ.ബി മുന്നറിയിപ്പ് കിട്ടി പ്രദേശത്ത് പട്ടാളക്കാരുടെ വ്യൂഹം തമ്പടിക്കുന്നുവെന്ന സാമൂഹ്യ മാധ്യമങ്ങളില്‍ പ്രചാരണവുമായി. ഇതോടെ വിദേശത്തുള്ളവരും ആശങ്കയോടെ നാട്ടിലേക്ക് വിളിക്കാന്‍ തുടങ്ങി. ഒടുവില്‍ കെ.വി അബ്ദുല്‍ ഖാദര്‍ എം.എല്‍.എയും സാമൂഹ്യ മാധ്യമങ്ങളിലൂടെ സത്യാവസ്ഥയറിയിച്ചു.