ചവറ: ഗ്രാമ പഞ്ചായത്തിലെ കുളങ്ങര ഭാഗം വാര്‍ഡിലെ മാലിന്യവാഹിനിയായ ഓട വൃത്തിയാക്കണമെന്നാവശ്യം ശക്തമാകുന്നു. ചവറ ബസ്റ്റാന്‍ഡില്‍ നിന്നു പടിഞ്ഞാറോട്ട് ടി.എസ് കനാലില്‍ പതിക്കുന്ന ഓടയാണ് മാലിന്യം കുമിഞ്ഞ് കൂടി ദുര്‍ഗന്ധം വമിക്കുന്ന അവസ്ഥയിലെത്തിയത്.
മണ്ണ് അടിഞ്ഞ് കൂടിയും മാലിന്യം നിറഞ്ഞും ഒഴുക്ക് നിലച്ചത് മൂലം ദുര്‍ഗന്ധം പരക്കുന്ന അവസ്ഥയിലായി. ഇത് മൂലം പ്രദേശവാസികള്‍ ആരോഗ്യ പ്രശ്‌നങ്ങള്‍ നേരിടുകയാണ്. കൂടാതെ കൊതുക് ശല്യവും വര്‍ധിച്ചിട്ടുണ്ട്. പഞ്ചായത്തില്‍ നിരവധി പരാതികള്‍ നല്‍കിയെങ്കിലും ഫലമുണ്ടായില്ല. പഞ്ചായത്ത് വൈസ് പ്രസിഡന്റിന്റെ വാര്‍ഡിലെ മാല്യന്യ പ്രശ്‌നത്തിന് ഉടന്‍ പരിഹാരം കാണാന്‍ പഞ്ചായത്ത്, ആരോഗ്യ വകുപ്പ് അധികൃതര്‍ തയാറാകണമെന്നാണ് നാട്ടുകാരുടെ ആവശ്യം.