കൊണ്ടോട്ടി: ലോക്ക്ഡൗണ്‍ കാലത്ത് ഉപഭോക്താക്കളെ വലയിലാക്കാന്‍ പലിശ രഹിത വായ്പയുമായി സഹകരണ ബാങ്കുകള്‍ രംഗത്ത്. കൊവിഡ് മുന്‍നിര്‍ത്തി മൂന്ന് മാസത്തേക്കാണ് പതിനായിരം മുതല്‍ 50,000 രൂപവരെ സ്വര്‍ണപ്പണയ വായ്പ സഹകരണ ബാങ്കുകള്‍ പ്രഖ്യാപിച്ചിരിക്കുന്നത്. എന്നാല്‍ മൂന്ന് മാസത്തിനുള്ളില്‍ സ്വര്‍ണം തിരിച്ചെടുക്കുകയോ പുതുക്കി വെക്കുകയോ ചെയ്തിട്ടില്ലെങ്കില്‍ എട്ടു മുതല്‍ 10 ശതമാനം വരെ പലിശ തുടര്‍ന്ന് നല്‍കേണ്ടി വരും.
മൂന്ന് മാസ കാലാവധി കഴിഞ്ഞാല്‍ പുതുക്കിയിട്ടില്ലെങ്കില്‍ തുടര്‍ന്നുള്ള മാസങ്ങളില്‍ 10 ശതമാനം പലിശയാണ് നല്‍കേണ്ടി വരിക. പുതുക്കി വെക്കുകയാണെങ്കില്‍ തുടര്‍ന്നുള്ള മാസങ്ങളില്‍ എട്ട് ശതമാനം പലിശ ഈടാക്കും. ലോക്ക് ഡൗണ്‍കാലത്ത് ഉപഭോക്താക്കളെ ആകര്‍ഷിപ്പിക്കുകയാണ് സഹകരണ ബാങ്കുകളുടെ ലക്ഷ്യം. മൂന്ന് മാസത്തെ പലിശ ഇളവ് ഉപഭോക്താക്കള്‍ക്ക് ആശ്വാസമെങ്കിലും തുടര്‍ന്ന് മുതല് തിരിച്ചെടുക്കാന്‍ കഴിയാത്തവരും പുതുക്കി വെക്കാന്‍ നിര്‍ബന്ധിതരാവുന്നവരുമായിരിക്കും കൂടുതലെന്ന് ബാങ്കുകള്‍ കണക്ക് കൂട്ടുന്നു. ഇത് ലക്ഷ്യം വച്ചു കൊണ്ടാണ് ഇളവ് പ്രഖ്യാപിച്ചിരിക്കുന്നത്.
ലോക്ക്ഡൗണ്‍ ആയതോടെ ഉപഭോക്താക്കളില്‍ നിന്ന് സഹകരണ ബാങ്കുകള്‍ക്ക് വേണ്ടത്ര വരുമാനം നേടാനാകുന്നില്ല. ദിവസ വേതന പിരിവുകളും ലോണുകളും അടക്കം കുറഞ്ഞതും തിരിച്ചടിയായിട്ടുണ്ട്.തുടര്‍ന്നാണ് സൗജന്യ സ്വര്‍ണപ്പണയ വായ്പ പദ്ധതിയുമായി രംഗത്തെത്തിയിട്ടുള്ളത്.