തിരുവനന്തപുരം: ലോക്ക് ഡൗണ്‍ പശ്ചാത്തലത്തില്‍ തയാറാക്കുന്ന സംസ്ഥാനത്തിന്റെ സാമ്പത്തിക സ്ഥിതി വിവര റിപ്പോര്‍ട്ട് ഉടന്‍. വിശദമായ റിപ്പോര്‍ട്ടിന് മുന്നോടിയായുള്ള ക്വിക്ക് റിപ്പോര്‍ട്ടാണ് 15 ദിവസത്തിനകം തയാറാവുക. വിശദമായ റിപ്പോര്‍ട്ടിന് രണ്ട് മാസത്തോളം സമയം വേണ്ടി വരുമെന്നും ഇതിനായി സര്‍ക്കാര്‍ ചുമതലപ്പെടുത്തിയ ഗുലാത്തി ഇന്‍സ്റ്റിറ്റ്യൂട്ട് ഓഫ് ഫിനാന്‍സ് ആന്‍ഡ് ടാക്‌സേഷന്‍ (ഗിഫ്റ്റ്) അധികൃതര്‍ അറിയിച്ചു.
ലോക്ക് ഡൗണ്‍ പശ്ചാത്തലത്തില്‍ വന്‍വരുമാന നഷ്ടമാണ് സംസ്ഥാനത്തുണ്ടായിരിക്കുന്നത്. ഈ സാഹചര്യത്തിലാണ് സംസ്ഥാനത്തിന്റെ സാമ്പത്തിക സ്ഥിതി വിവരം സംബന്ധിച്ച് പഠനം നടത്താനും റിപ്പോര്‍ട്ട് സമര്‍പ്പിക്കാനും സര്‍ക്കാര്‍ ഗുലാത്തി ഇന്‍സ്റ്റിറ്റ്യൂട്ടിനെ ഏല്‍പ്പിച്ചത്. രാജ്യത്തെ പ്രഗത്ഭരായ സാമ്പത്തിക വിദഗ്ധരെ ഉള്‍പ്പെടെ സഹകരിപ്പിച്ചാവും ഗിഫ്റ്റ് റിപ്പോര്‍ട്ട് തയാറാക്കുക. ക്വിക്ക് റിപ്പോര്‍ട്ടിനായുള്ള പ്രവര്‍ത്തനങ്ങള്‍ തുടങ്ങിക്കഴിഞ്ഞതായി ഗിഫ്റ്റ് ഡയരക്ടര്‍ കെ.ജെ ജോസഫ് സുപ്രഭാതത്തോട് പറഞ്ഞു.
ലോക്ക് ഡൗണ്‍ പ്രഖ്യാപിച്ചതിന് ശേഷമുള്ള സംസ്ഥാനത്തിന്റെ വരുമാനവും ചെലവും സംബന്ധിച്ചായിരിക്കും പ്രധാനമായും ക്വിക്ക് റിപ്പോര്‍ട്ടില്‍ പരാമര്‍ശിക്കുക. ഇക്കാലയളവിലെ സര്‍ക്കാരിന്റെ വരുമാന ഇടിവും രേഖപ്പെടുത്തും. സംസ്ഥാനത്തിന്റെ നികുതി വരുമാനം, നികുതിയേതര വരുമാനം, ജി.എസ്.ടി, കേന്ദ്രസര്‍ക്കാരില്‍ നിന്നുള്ള വിഹിതം തുടങ്ങിയ കാര്യങ്ങള്‍ ഉള്‍പ്പെടുത്തും. കൊവിഡ് സാഹചര്യത്തില്‍ സര്‍ക്കാര്‍ പെട്ടെന്ന് ഇടപെടേണ്ട മേഖലകളിലെ സാമ്പത്തിക ചെലവ് സംബന്ധിച്ച വിവരങ്ങളും റിപ്പോര്‍ട്ടിലുണ്ടാകും.
ലോട്ടറി, മദ്യം തുടങ്ങിയവയാണ് സംസ്ഥാനസര്‍ക്കാരിന്റെ പ്രധാന നികുതി വരുമാനമാര്‍ഗങ്ങള്‍. ലോക്ക് ഡൗണ്‍ പ്രഖ്യാപിച്ചതോടെ ഇത്തരത്തിലുള്ള എല്ലാ വരുമാനങ്ങളും നിലച്ചിരിക്കുകയാണ്. ഈ വരുമാന നഷ്ടം എത്രകാലം കൊണ്ട് വീണ്ടെടുക്കാനാവും എന്ന കാര്യത്തിലും വ്യക്തത വേണം. ഇത്തരത്തില്‍ വിവിധ മേഖലകള്‍ക്കുണ്ടായിട്ടുള്ള സാമ്പത്തിക തിരിച്ചടികളും അവയില്‍ നിന്ന് കരകയറാനുമുള്ള മാര്‍ഗങ്ങളും ഉള്‍പ്പെടുത്തിയാകും വിശദമായ സാമ്പത്തിക റിപ്പോര്‍ട്ട് തയാറാക്കുക.