പൊന്നാനി: കൊവിഡ് 19 നെതിരേ ലോകം മുഴുവന്‍ പോരാടുന്ന ഡോക്ടര്‍മാരും നഴ്‌സുമാരും ഉള്‍പ്പെടുന്ന ആരോഗ്യപ്രവര്‍ത്തകര്‍ക്ക് നന്ദി പറഞ്ഞ് ഗൂഗിള്‍ ഡൂഡില്‍. സമൂഹത്തിന്റെ സുരക്ഷയ്ക്ക് വേണ്ടി സ്വന്തം ജീവനെക്കുറിച്ചുപോലും ഓര്‍ക്കാതെ ജോലി ചെയ്യുന്ന ആരോഗ്യപ്രവര്‍ത്തകര്‍ക്കുള്ള ആദരമായാണ് ഇന്നലെ ഗൂഗിള്‍ ഡൂഡില്‍ അവതരിപ്പിച്ചത്.
കംപ്യൂട്ടര്‍ മൗസ് ഡൂഡിലില്‍ തൊടുമ്പോള്‍ എല്ലാ ഡോക്ടര്‍മാര്‍ക്കും നഴ്‌സിനും ആരോഗ്യപ്രവര്‍ത്തകര്‍ക്കും നന്ദി എന്ന സന്ദേശം കാണാം.
ഒപ്പം ഒരു ഹാര്‍ട്ട് ഇമോജി എല്ലാ ആരോഗ്യപ്രവര്‍ത്തകരിലേക്കും അയക്കുന്നതായാണ് ഡൂഡില്‍ ആനിമേഷനില്‍ കാണിച്ചിരിക്കുന്നത്. കൊവിഡ്-19 നെത്തുടര്‍ന്ന് ഗൂഗിള്‍ അവതരിപ്പിക്കുന്ന ഒരു സീരിസിന്റെ ഭാഗമായാണ് ഈ ഡൂഡില്‍.
ചരിത്ര മുഹൂര്‍ത്തങ്ങള്‍, ആഘോഷങ്ങള്‍, പ്രമുഖ വ്യക്തികളുടെ പിറന്നാള്‍-ചരമ വാര്‍ഷികങ്ങള്‍ എന്നിവയുടെ ഭാഗമായി ഗൂഗിള്‍ ഹോംപേജില്‍ ഡൂഡില്‍ തയാറാക്കാറുണ്ട്. സ്റ്റേ ഹോം സ്റ്റേ സേഫ് എന്ന ക്യാംപയിനുമായി കഴിഞ്ഞയാഴ്ച ഗൂഗിള്‍ ഡൂഡില്‍ അവതരിപ്പിച്ചിരുന്നു.