താമരശ്ശേരി: കനത്ത മഴയിലും കാറ്റിലും വീടിനുമുകളില്‍ തെങ്ങ് പൊട്ടിവീണ് വീട് ഭാഗികമായി തകര്‍ന്നു. എളേറ്റില്‍ ആശാരിതൊടുകയില്‍ വി.കെ അബ്ദുറഹിമാന്റെ വീടിനുമുകളിലാണ് വെള്ളിയാഴ്ച പുലര്‍ച്ചെ നാലുമണിയോടെ തെങ്ങ് പൊട്ടിവീണത്. ഓട്, ഫര്‍ണിച്ചറുകള്‍, വീട്ടുപകരണങ്ങള്‍ എന്നിവയ്ക്ക് കേടുപാടുകള്‍ സംഭവിച്ചു.
കൊടുവള്ളി: ശക്തമായ മഴയില്‍ ചുറ്റുമതില്‍ ഇടിഞ്ഞുവീണ് വീട് തകര്‍ന്നു. ആറങ്ങോട് മേലേ തൊടുകയില്‍ സതീഷ് കുമാറിന്റെ വീടാണ് തകര്‍ന്നത്. വെള്ളിയാഴ്ച്ച പുലര്‍ച്ചെ ഒന്നരയോടെയാണ് സംഭവം. സതീഷ് കുമാറിന്റെ വീടിന് സമീപത്തെ മറ്റൊരു വീടിനോട് ചേര്‍ന്ന ഉയരം കൂടിയ മതില്‍ സതീഷ് കുമാറിന്റെ വീടിന് മുകളിലേക്ക് ഇടിഞ്ഞു വീഴുകയായിരുന്നു.
വീട് പുര്‍ണമായും തകര്‍ന്നു. അപകടം നടക്കുമ്പോള്‍ സതിഷ് കുമാറിന്റെ ഭാര്യയും രണ്ടണ്ട് കുട്ടികളും വീട്ടില്‍ ഉറങ്ങിക്കിടക്കുകയായിരുന്നു. ഇവര്‍ പരിക്കേല്‍ക്കാതെ അത്ഭുതകരമായി രക്ഷപ്പെടുകയായിരുന്നു. വില്ലേജ് അധികൃതരും നഗരസഭാ ഉദ്യോഗസ്ഥരും സ്ഥലം സന്ദര്‍ശിച്ചു.
കുന്ദമംഗലം: കനത്തമഴയില്‍ മതിലിടിഞ്ഞ് വീണ് വീട് തകര്‍ന്നു. കുന്ദമംഗലത്തിനടുത്ത് പതിമംഗലം ആമ്പ്രമ്മല്‍ കോടക്കാം കുഴിയില്‍ റഫീഖിന്റെ വീടാണ് തകര്‍ന്നത്. വെള്ളിയാഴ്ച പുലര്‍ച്ചെ രണ്ട് മണിയോടെയാണ് അപകടം. ഗ്രാമപഞ്ചായത്ത് നിര്‍മിച്ചുകൊണ്ടിരിക്കുന്ന റോഡിന്റെ മതിലാണ് ഇടിഞ്ഞ് വീടിന് മുകളിലേക്ക് വീണത്.
ഒരാഴ്ച മുന്‍പാണ് റഫീഖിന്റെ കുടുംബം ഈ വീട്ടിലേക്ക് താമസം മാറിയത്. വീടിന്റെ ഒരു ഭാഗം പൂര്‍ണമായും തകര്‍ന്നു. ആര്‍ക്കും പരുക്കില്ല. അടുക്കളയിലെ ഗ്യാസ് അടുപ്പ് അടക്കമുള്ള ഉപകരണങ്ങള്‍ക്ക് നാശനഷ്ടമുണ്ടായി.